Anëtari i LDK-së në KQZ, Florian Dushi, ka reaguar pas raportimeve se kandidatit të LDK-së për kryetar të Prishtinës, Përparim Rama, i është refuzuar aplikimi në KQZ për shkak se ka aplikuar me letërnjoftim të UNMIK-ut.

Ai ka bërë me dije se kandidatit Përparim Rama posedon dokumentacion të Republikës së Kosovës dhe plotëson të gjitha kushtet ligjore për t`u certifikuar si kandidat për Kryetar të Prishtinës.

Ai ka deklaruar se Komisioni Qendror i Zgjedhjeve tani është në fazën e shqyrtimit të kërkesave të subjekteve politike e kandidatëve për certifikim, duke shtuar se lëshimi ka ndodhur pa fajin e kandidatit Rama.

Postimi i plotë i Dushit:

Komisioni Qendror i Zgjedhjeve, përkatësisht Zyra për Regjistrim e Certifikim, është në fazën e shqyrtimit të kërkesave të subjekteve politike e kandidatëve për certifikim.

Kjo është fazë e shqyrtimit, më pas do të pasojë vendimi përfundimtar i KQZ-së për certifikim.

Në këtë fazë, lëshimet, sidomos ato teknike gjatë shqyrtimit nga ana e Zyrës janë të mundshme prandaj ekziston periudha dhe mundësia për evitimin e tyre.

Madje, në këtë rast, lëshimi ka ndodhur pa fajin e kandidatit Përparim Rama i cili, ndryshe nga shumë kandidatë të tjerë, është i lindur dhe i rritur në Prishtinë, posedon dokumentacion të Republikës së Kosovës dhe plotëson të gjitha kushtet ligjore për t’u certifikuar si kandidat për Kryetar të Prishtinës.