Dy vjet nga aksidenti tragjik në Slavonski Brod, në të cilin vdiqën 10 persona
Në një aksident trafiku që ndodhi dy vjet më parë në autostradën Slavonski Brod në Kroaci, humbën jetën 10 persona dhe 45 të tjerë u lënduan në autobusin me targa të Kosovës.
Në autobus kishte 67 pasagjerë, përfshirë fëmijë dhe dy shoferë, ndërsa nëntë pasagjerë dhe një shofer humbën jetën.
Autobusi ishte nisur nga Frankfurti i Gjermanisë drejt Prishtinës dhe i përkiste një kompanie nga Kosova. Ai ishte aksidentuar në autostradën A3 Zagreb – Lipovac.
Kryeministri i Kosovës, Albin Kurti, bashkë me disa prej ministrave, ka vizituar disa nga të mbijetuarit në spitalet e Kroacisë, ndërsa ambasadori i Kosovës në Zagreb, Gëzim Kasapolli, ka qenë paraprakisht në spitalin rajonal në Slavonski Brod.
Sipas medieve kroate, shoferët e autobusit nga Kosova që po bartte mërgimtarë nga Frankfurti për në Prishtinë kishin pushuar në Bregana për gjysmë ore para aksidentit. Aty ata ishin ndërruar dhe drejtimin e autobusit e kishte marrë shoferi tjetër. Supozohet se aksidenti është shkaktuar nga lodhja e shoferit.
Presidentja Vjosa Osmani kishte shpallur ditë zie në Kosovë për shkak të këtij aksidenti tragjik./KosovaPress/
