Me pikë maksimale është poentuar Ilire Thaçi për pozitën Zyrtar Certifikues për Pagesa në KRU “Hidromorava”, shkruan Radio Star.

Ndryshe nga pesë kandidatët e tjerë, Thaçi ishte poentuar me 69 pikë në testin me shkrim për pozitën e lartcekur.
Por, kandidatët e tjerë kanë shprehur pakënaqësi me këtë renditje të konkurrentëve për këtë pozitë.

Sipas tyre, Ilire Thaçi është favorizuar pasi bashkëshorti i saj Arton Thaçi ka punuar një kohë të gjatë dhe është shok me Kryeshefin aktual të Hidromorava, Ymer Salihu.
Në fotografitë në rrjetet sociale, Salihu shihet i shoqëruar nga Arton Thaçi, bashkëshorti i Ilire Thaçit.

Dyshimet e kandidatëve janë edhe në anëtarët e Bordit të Drejtorëve të cilët sipas tyre janë pjesëmarrës në kurdisjen e konkurseve në Hidramorava.

Të pakënaqurve iu është pamundësuar edhe të ankohen, meqë janë paralajmëruar që kanë kohë vetëm tri ditë të ankohen, por që rrjedhimisht ia ka vështirësuar ta bëjnë një gjë të tillë, pasi dy nga ditët kanë qëlluar ditë vikendi.
E kontaktuar nga Radio Star, Ilire Thaçi e ka mohuar se është favorizuar, duke thënë se për momentin e ka kaluar vetëm testin me shkrim.
“Për momentin vetëm testin me shkrim e kam kaluar, nuk ka pas asnjë favorizim. Bashkëshorti im ka punuar me Kryeshefin më herët me një bankë”, tha ajo.

Po ashtu Radio Star ka provuar të flas me Kryeshefin Salihu, por ky i fundit nuk është përgjigjur në telefon deri në kohën kur është publikuar ky artikull.
Megjithatë, për Salihun edhe më herët ishte raportuar për “favorizime” të ish kolegëve të një banke ku kishte punuar më herët.

Kallxo.com kishte raportuar se Ymer Salihu dhe Zyrtarja e Lartë Financiare, Merita Dauti-Xhelili në të kaluarën kanë qenë kolegë në një bankë.
Dauti – Xhelili është e njohur e kryeshefit aktual të kësaj kompanie. Vajza e xhaxhit të Ymer Salihu është e martuar me vëllanë e Merita Dauti – Xhelilit.

Salihu kishte thënë se ka vite që nuk e ka takuar Merita Dauti- Xhelilin.
Ymer Salihu, pozitën e Kryeshefit të Hidramoravës e kishte marrë vitin e kaluar
Gjetjet e Auditorit për ‘Hidromoravën’ në vitin 2021.

Në raportin e Zyrës Kombëtare të Auditimit për vitin 2021, për Kompaninë Rajonale të Ujësjellësit ‘Hidromorava’ janë 9 gjetje, dhe kryesisht kanë të bëjnë me fushën financiare. Për zbatueshmërinë e tyre, ZKA do të njoftojë në raportin që do ta publikojë në vitin 2023.

Gjetjet përfshijnë mbivlerësim të shpenzimeve të periudhës për shumën prej 241 mijë e 110 euro; mosaplikim i provizionimit të llogarive të arkëtueshme; mospërputhje në mes vlerës së pasurive afatgjata të prezantuara në pasqyrat financiare me shënimet në kontabilitet apo llogaritje e gabuar e shpenzimeve të zhvlerësimit. /Radio Star/