Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, biznese e institucione financiare që po shkaktojnë humbje e pasiguri. Hajnat në të shumtën e rasteve arrijnë që të ikin nga duart e organeve të rendit, por ka të atillë që kapen pas veprimeve hetimore të Policisë, raporton Sinjali.

Kështu ka ndodhur së fundi në Prishtinë, pasi një person dyshohet se kreu vjedhje në depon e shitores ‘Viva Fresh’ në rrugën ‘Lidhja e Prizrenit’.

Burimet e Sinjalit brenda Prokurorisë kanë bërë me dije se 67-vjeçari është identifikuar pas gati një jave në arrati dhe i njëjti është arrestuar gjatë ditës së djeshme.

Sinjali mëson se i moshuari dyshohet se fillimisht ka vjedhur mallra në vlerë rreth 1 mijë euro dhe më pas është identifikuar pasi ishte kthyer për herën e dytë në depon në fjalë, për të kryer një vjedhje tjetër.

Pas arrestimit, i dyshuari është shoqëruar në stacion policor ku është intervistuar lidhur me rastin.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Vjedhje e rëndë’.