Ministri i Infrastrukturës, Liburn Aliu, ka thënë se në vizitën e fundit në Beograd ka treguar se do të ndërtohet hekurudha Durrës – Prishtinë. Pa u ndërtuar kjo hekurudhë, Aliu ka thënë se nuk do të ketë asnjë lloj lidhjeje me Serbinë.

Këto komente Aliu i ka bërë duke iu përgjigjur pyetjes së deputetes së AAK-së, Time Kadrijaj, e cila e ka pyetur se “çfarë obligimesh keni marrë në Beograd?”.

“Të gjitha këto që po i thoni janë konkluza të juaja dhe mund të deklaroni çfarë të doni. Në Beograd ua kam bërë të qartë që do ta ndërtojmë hekurudhën Durrës – Prishtinë. Dhe pa e bërë hekurudhën Durrës – Prishtinë, nuk ka asnjë lloj lidhje tjetër me Serbinë. Edhe me Malin e Zi e kemi diskutuar shumë qartë hekurudhën Deçan – Plavë. Këtë ua kam sqaruar edhe në Beograd”, ka thënë Aliu.

Ai ka theksuar se “kjo ka qenë detyrë e imja dhe e kam kryer detyrën time”.

Më tutje, Aliu ka treguar edhe planet e tjera për linjat hekurudhore.

“Prishtinë- Pejë, hekurudha që është aktuale do të modernizohet dhe e kemi futur në buxhetin e vitit që vjen. Hekurudhën Klinë – Prizren do ta funksionalizojmë fillimisht, e më pas mbase do të vjen puna të modernizimi. Kjo hekurudhë ka me qenë urëlidhëse në mes të portit të Durrësit dhe Prishtinës”, është shprehur Aliu.