Gjykata Themelore në Prishtinë edhe në rigjykim ka shpallur aktgjykim lirues ndaj Xhafer Ramajt dhe Shefqet Morinës, të cilët akuzoheshin se në cilësinë e zyrtarëve të Komunës së Drenasit kanë keqpërdorur detyrën zyrtare.

Këtë e kanë konfirmuar për “Betimi për Drejtësi”, mbrojtësi i Ramajt, avokati Ramë Dreshaj dhe mbrojtësja e Morinës, avokatja Hedije Ademi.

Dy avokatët konfirmuan se klientët e tyre u liruan nga akuza në mungesë të provave dhe se aktgjykimi u shpall të hënën nga gjykatësja e rastit Sulltane Hoti, e cila ka njoftuar se kundër këtij aktgjykimi lejohet ankesa në afat prej 30 ditësh.

Ndryshe, edhe në gjykimin e parë, më 9 tetor 2023, Gjykata Themelore në Prishtinë kishte shpallur aktgjykim lirues ndaj të akuzuarve Ramaj dhe Morina.

Por, Gjykata e Apelit më 21 shkurt 2024 aprovoi si të bazuar ankesën e Prokurorisë Themelore në Prishtinë dhe anuloi aktgjykimin e shkallës së parë, duke kthyer çështjen në rigjykim dhe vendosje.

Sipas aktakuzës së përpiluar më 24 gusht 2020, i pandehuri Xhafer Ramaj, në pozitën shef i sektorit të Gjeodezisë dhe i pandehuri Shefqet Morina, në pozitë të shefit në sektorin e Kadastrit në Komunën e Drenasit, kanë keqpërdorur detyrën apo autoritetin e tyre zyrtar, e kanë tejkaluar kompetencat e tyre.

Këtë thuhet se e kanë bërë në atë mënyrë që në periudhën kohore prej vitit 2010 e deri në vitin 2018, në vazhdimësi, me rastin e ndërrimit të destinimit të tokave bujqësore nga kultura arë apo livadh në tokë ndërtimore, nuk kanë respektuar asnjë procedurë ligjore.

Tutje, thuhet se me rastin e ndërrimit të destinimit të tokave, edhe pse paraprakisht nuk ka pasur vendim të Kuvendit Komunal, pëlqim nga ministria apo pëlqim urbanistik, varësisht nga kategoria apo klasi i tokës, të pandehurit në kundërshtim me ligjet e lartcekura dhe udhëzimin administrativ, kanë bërë ndërrim të destinimit të tokave prej tokës bujqësore në tokë ndërtimore në 16 zona kadastrale, në Komunë të Drenasit, ZK. Zabel i Ulët, ZK. Sankoc, ZK. Kortoicë e Epërme, ZK. Tërdec, ZK. Polluzhë, ZK. Tërstenik, ZK. Llapushnik, ZK. Gllobar, ZK. Shtrubullovë, ZK. Negroc, ZK. Nekoc, ZK. Komoran, ZK. Gllogoc, ZK. Arllat, ZK. Qikatovë e Vjetër dhe ZK. Qikatovë, në sipërfaqe të përgjithshme prej 25.55.51 hektarë.

Sipas Prokurorisë, me rastin e ndërrimit të destinimeve të tokave nga ajo bujqësore në atë tokësore, nuk është bërë kompensimi për ndërrim, me ç’rast Komuna e Drenasit është dëmtuar në shumë prej 231 mijë e 689 euro.