Ka gjashtë muaj që kryetari i Leposaviqit, Lulzim Hetemi, jeton brenda ndërtesës së komunës. Thotë se do të vazhdojë të mbetet aty, derisa largimin nuk ia kërkon shteti i Kosovës, përkatësisht qeveria dhe kryeministri Kurti.

Në intervistën e realizuar nga gazetari Jeton Musliu e producentja Aferdia Peci, e cila transmetohet e plotë sonte në RTK Prime në orën 20:50, Hetemi kërkon që KFOR-i të largohet nga objekti i komunës sepse konsideron se situata është e qetë.

Ai flet edhe për mundësinë e dorëheqjes, arsyen përse nuk largohet nga komuna e shumë çështje të tjera.

Hetemi tha se kur hyri në komunë në muajin maj, përveç kaosit, nuk gjeti asnjë punëtor të administratës. Por tani, gjërat kanë ndryshuar. Ka 13 drejtori, 7 drejtohen nga serbët e 6 nga shqiptarët.

“Këta janë punëtorë të rinj të administratës, janë serbë të Leposaviqit”, tha Lulzim Hetemi. E konfirmon se përveç qeverisë dhe kryeministrit Kurti, të gjithë ia kanë kërkuar dorëheqjen.

“Respekt për amerikan e respekt për miqtë tanë ndërkombëtarë”, tha ai. Ai ka folur dhe për mundësinë e që të japë dorëheqje.“Dorëheqje… për çka”, tha ai.

Hetemi tregon se është i gatshëm menjëherë të largohet nga zyra, me kushtin që në këtë pozitë të vijë një kryetar që njeh dhe respekton shtetin e Kosovës.

E derisa të ndodhë kjo, Hetemi do të vazhdojë të qëndrojë brenda komunës së Leposaviqit.