Kryeministri i Shqipërisë, Edi Rama, në prezantimin e Projektbuxhetit për vitin 2022 ka thënë se një tjetër investim i rëndësishëm është projekti i satelitëve.

Rama ka thënë se sateliti i parë “Albania 1” do të jetë në dispozicion 24 orë për institucionet përkatëse dhe policia do të ketë të dhëna në kohë reale, duke filluar nga muaji mars 2022.

Ai ka shtuar se policia do të ketë të dhëna në kohë reale për shkeljet në terren, për ndërtimet pa leje apo edhe ndotjen e mjedisit.

“Gjithçka do të kaloj te një sy tjetër që është lart, që nuk ka kushërinj, miq, parti, asnjë lidhje emocionale por vetëm mbledhje dhe kalim të dhënash në duart e autoriteteve”, ka thënë Rama.

Ditë më parë, Rama ka deklaruar ambicien që Shqipëria do të ketë dy satelitë në orbitë.

Ambicien për të pasur dy satelitë në orbitë “Albania 1” dhe “Albania 2”, Rama e ka bërë me dije në Kuvend, duke shkaktuar edhe të qeshura në radhët e opozitës.

Satelitët artificialë janë pajisje të cilat shërbejnë për transferim të të dhënave anembanë rruzullit tokësor. Ata janë objekte të ndërtuara nga njeriu, të cilat janë të vendosura në orbitë nga largësia 2 mijë kilometra deri në 35 mijë kilometra nga sipërfaqja e tokës.