Ish-kryengociatorja e Kosovës në dialogun me Serbinë, Edita Tahiri, i ka reaguar kryeministrit Albin Kurti, pasi ky i fundit ia hodhi fajin qeverive të kaluara për problemin aktual me krizën energjetike në vend.

Tahiri ka thënë se qeveritë janë për të zgjidhur problemet sepse për këtë janë votuar dhe jo për t’i fajësuar pushtetet e kaluara.

“Qeveritë janë për të zgjidhur problemet sepse për këtë punë kanë marre votat, dhe jo për të fajësuar qeveritë e kaluara…”, ka shkruar Tahiri në llogarinë e vet në  “Facebook”.

Teksa ka mbajtur fjalim në Mbledhjen e Këshillit të Përgjithshëm të LV-së, kryeministri Albin Kurti, ka folur edhe për krizën energjetike në vend. Për këtë Kurti ia ka hedhur fajin qeverive të kaluara, duke u shprehur se e kanë lënë Kosovën në terr.

Kurti tha se e kanë gjetur shtetin përtokë që gjakonte në të gjitha anët “e tërësisht i papërgatitur për sfidat e shekullit 21”.

“Unë e kuptoj frustrimin e qytetarëve me mungesën e energjisë elektrike, më besoni se edhe unë jam i frustruar, por le të jetë ky një rikujtim për gjendjen në të cilën ata që qeverisën për dy dekada na lanë shtetin sepse si njerëz të territ që ishin që punët i bënin natën e larg syrit të qytetarëve ata s’kishin se si ta lenin Kosovën ndryshe pos në terr, por ajo epokë ka përfunduar. Rrugëtimi që kemi filluar së bashku është me plot sfida por do të na dërgojë në ditë më të mira”, ka thënë Kurti.