Një ekip me zyrtarë amerikanë është nisur drejt Rusisë për të diskutuar një armëpushim të mundshëm në Ukrainë, sipas presidentit Donald Trump, shkruan BBC.

Lajmi vjen pasi zyrtarët ukrainas ranë dakord për një armëpushim 30-ditor pas një takimi të shumëpritur me zyrtarët amerikanë në Arabinë Saudite.

Më parë, Sekretari i Shtetit Marco Rubio tha se “topi është me të vërtetë në fushën e tyre [të Rusisë]” dhe se SHBA beson se e vetmja mënyrë për t’i dhënë fund luftimeve ishte përmes negociatave të paqes.

Vizita amerikane vjen pasi Kremlini pretendoi se presidenti Vladimir Putin kishte vizituar rajonin Kursk të Rusisë, pjesë të të cilit kanë qenë nën kontrollin e Ukrainës që nga një inkursion vitin e kaluar.

Pas takimit në Jeddah të martën, presidenti ukrainas Volodymyr Zelensky tha se tani i takon SHBA-së të bindë Rusinë që të pajtohet me propozimin “pozitiv”.

Kremlini ka thënë se po studionte marrëveshjen e armëpushimit dhe se një telefonatë midis Trump dhe Putin është e mundur.

Duke folur me kryeministrin e Irlandës, Micheál Martin në Zyrën Ovale të mërkurën, Trump tha se kishte marrë “mesazhe pozitive” në lidhje me mundësinë e një armëpushimi.

“Por një mesazh pozitiv nuk do të thotë asgjë,” tha ai. “Kjo është një situatë shumë e rëndë”.

Trump nuk specifikoi se cilët zyrtarë po udhëtonin për në Moskë.

Megjithatë, sekretarja e shtypit, Karoline Leavitt, u tha gazetarëve në Shtëpinë e Bardhë se Sekretari i Sigurisë Kombëtare, Mike Waltz, kishte folur me homologun e tij rus.