Një shtetas shqiptar është ekzekutuar me armë zjarri ditën e sotme në Ekuador.

Mediat ekuadoriane raportojnë se bëhet fjalë për 53-vjeçarin Arjanit Rizaj, i cili është vrarë me armë zjarri para spitalit “Luis Vernaza” në Guayaquil, ku kishte shoqëruar bashkëshorten e tij dhe vetë po qëndronte brenda makinës së parkuar.

Banorët dhe disa shitës të zonës që panë ngjarjen nga afër deklaruan për policinë se në drejtim të shqiptarit u qëlluar nga një motoçikletë e bardhë me të cilën po lëviznin dy persona. Autorët u larguan në drejtim të paditur pasi kryen vrasjen.

Sipas informacioneve të para nga Policia Kombëtare e Ekuadorit, vrasësit kanë përdorur një armë zjarri të kalibrit 9 milimetra.

Fillimisht Rizaj u dërgua në urgjencën e spitalit “Luis Vernaza”, dhe më pas në klinikën “Panamericana”, ku mjekët tentuan ta mbanin në jetë, por plagët e shkaktuara nga arma e zjarrit ishin të rënda duke i shkaktuar vdekjen.

Bashkëshortja e 53-vjeçarit shqiptar ka deklaruar për hetuesit se ajo e pa skenën nga shumë pranë.

Ajo u tha oficerëve se nuk e dinte motivin e sulmit ndaj bashkëshortit të saj. Sipas saj, Rizaj nuk punonte pasi nuk kishte dokumente të vlefshme në Ekuador, prandaj mbijetonte me paratë që i dërgonte nga Shqipëria familja e tij, ose vëllai i tij që banonte në Kanada.

Vrasja ka ndodhur në të njëtjën ditë me arrestimin e bosit të trafikut të kokainës Dritan Rexhepi, i cili u prangos sot në Turqi, megjithatë nuk dihet nëse kanë lidhje me njëra-tjetrën.

#Guayaquil
Un caso de sicariato ocurrió cerca del sector de emergencia del hospital Luis Vernaza pic.twitter.com/IfrkaCn2m4

— Minuto & Medio (@MinMedio) November 10, 2023