Makina “Cybertruck” e liderit çeçen Ramzan Kadyrov ka ndaluar së funksionuari, dhe për këtë ai fajëson prodhuesin amerikan dhe pronarin e Tesla, Elon Musk.

Kadyrov është ankuar në rrjetet sociale, se sipas tij, Elon Musk i dha “një dhuratë nga zemra” dhe më pas ia bllokoi nga distanca.

“Jep dhurata të shtrenjta nga zemra, dhe më pas i çaktivizon ato nga distanca. Kohët e fundit, Musk çaktivizoi nga distanca Cybertruck-un tim. Kjo nuk është burrërore. Duhej të tërhiqja kalin e hekurt. Pse Elon? Kush e bën këtë?”, ka shkruar Kadyrov në rrjetet sociale.

Në gusht, kreu i Çeçenisë shkroi se kishte marrë një makinë si dhuratë nga një biznesmen amerikan, të cilën ai premtoi ta dërgonte në frontin e luftës. Vetë Musk, megjithatë, mohoi se ai i kishte dhënë diçka Kadyrov-it.