Emisari i Britanisë së Madhe për Ballkanin Perëndimor, Stuart Peach është duke qëndruar për vizitë në Serbi.

Përgjatë kësaj vizite zyrtare, Peach është deklaruar në lidhje me situatën e tanishme në mes Kosovës dhe Serbisë.

Zyrtari britanik ka thënë se pret që do të ketë një marrëveshje gjithëpërfshirëse, përfundimtare, ligjërisht të obligueshme për normalizimin e marrëdhënieve ndërmjet Kosovës dhe Serbisë.

Gjatë vizitës së në Beograd, Stuart ka thënë se u takon liderëve të Prishtinës dhe Beogradit që të bien dakord për formatin dhe përmbajtjen e saktë të marrëveshjes, në kuadër të procesit të dialogut.

Peach ka theksuar se më e rëndësishmja është që kjo marrëveshje duhet të jetë e pranueshme, për qytetarët e të dyja shteteve dhe që të sjell përfitim afatgjatë në rajon.