Në përfundim të takimeve dyditore në Tiranë, delegacioni i Parlamentit Evropian (PE), i cili ka ardhur me qëllim kryesor diskutimet për zgjidhjen e ngërçit politik në Shqipëri në mes të Qeverisë së Shqipërisë dhe opozitës, ka mbajtur paraditen e kësaj të enjteje një konferencë për medie, në qendër të së cilës ishte mesazhi për bashkëpunim përpara vendimit për çeljen e negociatave.

Kryesuesi i këtij delegacioni, Tunne Kelam, ka deklaruar që në fillim se kishin ardhur në Tiranë në atmosferën e shpresës, edhe pse duket se po largohen prej këtej të zhgënjyer, për shkak të ndasive të thella dhe strategjive të kundërta mes opozitës dhe qeverisë.

“Duam që Shqipëria të hapë zyrtarisht negociatat për anëtarësim në qershor, e për këtë duam të mos shkaktohen vonesa të tjera për shkak të mosmarrëveshjeve kombëtare. Shqipëria ka bërë progres domethënës në shumë fusha, ka bërë hapa të mëdhenj përpara në reformën në drejtësi. Duhen kaluar ndasitë partiake për çështjen e integrimit dhe bojkotimi i Parlamentit në vetvete përbën një sinjal shumë të keq. Nuk mund të gjesh pretendim për të vonuar hapjen e negociatave. Gjithashtu jemi kundër protestave të dhunshme, nuk është mënyrë demokratike për zgjidhjen e problemeve. Shqipëria ka nevojë për shumë herë më tepër hapësirë për shoqërinë civile, e cila duhet të ketë më shumë qasje në institucione. Ndërkohë, zëri i të rinjve duhet dëgjuar nga qeveria për Reformën në Arsimin e Lartë”, ka thënë Kelami.

Ndërsa Knut Fleckenstein nuk ka ndryshuar aspak qëndrim të ashpër në lidhje me opozitën, siç ka mbajtur edhe gjatë takimit të mëhershëm të kësaj të majte me kryetarin e Kuvendit, Gramoz Ruçi.

“Më 19 qershor Këshilli do të marrë vendimin për Shqipërinë, teksa procesi i reformave është duke vazhduar dhe vettingu po ashtu. Ne i bëjmë thirrje Këshillit të përqendrohet në këto fakte, që në qershor të çelen negociatat. Sa i përket problemeve tuaja të brendshme, ne nuk kemi dyshim që ky Parlament do të vazhdojë rrugëtimin e tij. Parlamenti do të vazhdojë rrugëtimin, ndoshta edhe me anëtarë të rinj. Jam zhgënjyer shumë veçanërisht nga kryetarja e LSI-së, Monika Kryemadhi, e cila na tha që opozita e ka marrë vendimin dhe nuk ka kthim pas. Presim që deputetët të bëjnë punën e tyre dhe të kthehen në Parlament. Edhe sikur opozita të ketë të drejtë për akuzat, bojkotimi nuk zgjidh asgjë”, ka thënë Fleckensteini.

Eurodeputeti ka rimarrë fjalën në këtë konferencë edhe për një ndërhyrje të shkurtër.

“Doja të thosha edhe se organizatorët e protestave duhet të kujdesen të mos jenë të dhunshme, të mbajnë përgjegjësi për çdo akt që del përtej kontrollit të tyre. Nëse gjatë të gjithë kësaj kohe do të shohim pamje dhune nga rrugët e Tiranës, do të ketë pasoja në vendimin për negociatat”, ka thënë Fleckensteini. /Top Channel/