Sot nga ora 18:00 përballen Kroacia dhe Spanja. Kombëtarja e Kroacisë dhe ajo e Spanjës do të ballafaqohen sot nga ora 18:00.

Trajneri i Spanjës, Luis Enrique ka folur në konferencë shtypi para ndeshjes ndaj Kroacisë:

“Unë jam aq i kënaqur me skuadrën time dhe me secilin nga lojtarët e mi që, sinqerisht, secili prej tyre mund të startojë sot kundër Kroacisë”, tha ai.

“Për një ekip si ne, qendra e fushës është shumë e rëndësishme. Pa bërë gjërat tona në mesfushë ne nuk jemi vetvetja, kjo gjë vlen edhe për Kroacinë. Do të jetë një betejë për kontroll sot”, shtoi ai.

“Skuadra ime ka pasur qëndrim identik që nga ndeshja në Suedi dhe golat që shënuam kundër Sllovakisë nuk ndryshojnë asgjë. E vetmja gjë që do të thosha është përfundimi i grupit me një rezultat të fuqishëm, është i mirë sepse shton besimin”, vazhdoi ai.

“Kroacia është një ekip që ne e njohim mirë, futbollistët e tyre luajnë së bashku për një kohë të gjatë, ne të gjithë e njohim shumë mirë njëri-tjetrin. Besimi im në Spanjën është i njëjtë si para turneut, mendoj se merituam ta fitojmë grupin, për sa i përket motivimit dhe moralit ne jemi në formën më të mirë të mundshme”, përfundoi Luis Enrique.

Fituesi i ndeshjes mes Kroacisë dhe Spanjës në çerekfinale takohet me fituesin e ndeshjes tjetër Francë-Zvicër.