Kryetari i PDK-së, Enver Hoxhaj i ka reaguar ashpër kryeministrit Kurti në lidhje me deklaratat për marrëveshjen mes Hashim Thaçit (sa ky ishte kryeministër) dhe NATO-s për prezencën e FSK-së në veri, të cilën kryeministri tha se e ka çuar në prokurori.

Hoxhaj përmes një postimi në llogarinë e vet në “Facebook”, ka shkruar se Albin Kurti nuk mund të mbijetojë politikisht pa Hashim Thaçin.

Hoxhaj ka theksuar se Kurti prapë po vazhdon të merret me emrin e tij.

“Albin Kurti nuk mund të mbijetojë politikisht pa Hashim Thaçin. Tërë karrierën e tij politike e ka orientuar në përbaltjen e figurës së tij dhe kurrë nuk ia ka arritur. Edhe tani që presidentin Thaçi nuk e kemi këtu, Kurti prapë po vazhdon të merret me emrin e tij. Zotimet e kryeministrit Thaçi me NATO-n kanë qenë dhe mbeten legjitime dhe faktikisht po zbatohen edhe nga kjo Qeveri, sikur të gjitha ato paraprake. Përndryshe, ky kryeministër do të duhej ta dëshmonte të kundërtën duke ndërmarrë hapa konkret për anulimin e saj”.

“Më shumë sesa për presidentin Thaçi dhe zotimet në esencë, kjo qasje e tregon për inferioritetin e tij patriotik e politik dhe mungesën e vizionit qeverisës. Por, nëse dëshiron të flasim me fakte, qe një: Albin, ti je kryeministri i vetëm në Evropë pa asnjë kontratë për vaksina”, ka shkruar Hoxhaj.