Instituti EPIK, duke komentuar raportin e fundit të “Freedom House”, ka theksuar se ky raport ka konfirmuar se demokracia në Kosovë mbetet larg vendeve të tjera të Ballkanit Perëndimor dhe BE-së.

Në këtë kontekst, EPIK-u, ka vlerësuar se ky raport duhet të shërbejë si moment unifikimi të spektrit politik me qëllim të avancimit të demokracisë së Kosovës.

“Në vitin 2010, Kosova ishte ranguar me 32 pikë, ndërsa në vitin 2020 ka marr 36 pikë. Me fjalë të tjera, me trendin e tanishëm të progresit, Kosovës do t’i duhen 30 vite për të arritur nivelin e demokracisë të Malit të Zi, ndërsa 115 vite për të arritur nivelin e demokracisë së Sllovenisë”, ka njoftuar EPIK-u.

Njoftimi i plotë i Institutit EPIK:

Kosova: vend me demokracinë më të dobët në rajon

Dje, Freedom House publikoj raportin e radhës: “Vendet në Tranzicion 2020”. Raporti bënë rangimin e 29 vendeve mbi kriteret në vijim: qeverisja demokratike, procesi zgjedhor, shoqëria civile, liria e mediave, korrupsioni, korniza ligjore dhe pavarësia gjyqësore.

Raporti 2020 konfirmojë degradimin e vazhdueshëm demokratik në Ballkanin Perëndimor. Tani, Serbia dhe Mali i Zi nuk konsiderohen më demokracitë dhe iu kanë bashkangjitur vendeve të tjera të Ballkanit në kategorinë e vendeve me regjimet hibride me elemente të demokracisë dhe autoritarizmit.

Të gjitha vendet e Ballkanit, me përjashtim të Kosovës dhe Maqedonisë së Veriut, kanë vazhduar trendin negativ të degradimit të kualitetit të demokracisë. Raporti nënvizon që zhvillimet e fundit në Kosovë dhe Maqedoninë e Veriut kërcënojnë progresin e arritur deri më sot.

Krahasuar me vitin 2010 të gjitha vendet e Ballkanit Perëndimor, përveç Kosovës, kanë demokraci më të dobëta, përkundër avancimit në procesin integrues.

Sa i përket Kosovës, raporti njeh progresin inkremental, por të vazhdueshëm, të demokracisë në Kosovë. Njëkohësisht raporti konfirmon që Kosova është vend më demokracinë më të dobët në rajon. Në fakt, Kosova është vetëm 0.18 pikë larg kualifikimit si shoqëri me “Regjim Gjysmë-Konsoliduar Autoritar”.

Në vitin 2010, Kosova ishte ranguar me 32 pikë, ndërsa në vitin 2020 ka marr 36 pikë. Me fjalë të tjera, me trendin e tanishëm të progresit, Kosovës do t’i duhen 30 vite për të arritur nivelin e demokracisë të Malit të Zi, ndërsa 115 vite për të arritur nivelin e demokracisë së Sllovenisë.

Raporti i radhës nga Freedom House konfirmon që demokracia në Kosovë mbetet larg vendeve të tjera të Ballkanit Perëndimor dhe BE-së, prandaj duhet të shërbej si moment unifikimi të spektrit politik me qëllim të avancimit të demokracisë së Kosovës.  (L.G: ‘Epoka e re’)

https://www.facebook.com/epikinstitute/photos/a.2211430999128116/2640807329523812/?type=3&theater