Shkruan: Mal Qorraj

“Epoka e re” sot ka rrumbullakuar 6 000 numra për 20 vjet të rrugëtimit të saj në tregun medial. Ky numër i sotëm që keni në duar, i 6 000-ti, është i veçantë për faktin se në të keni përshtypjet e të gjithë atyre që kanë kaluar në këtë medium dhe atyre që janë pjesë e saj.

“Epoka e re” për këto 20 vjet ka përgatitur profesionalisht gazetarë të shumtë, disa prej të cilëve rrëfejnë në këtë numër jubile, po ashtu ka përgatitur redaktorë dhe kryeredaktorë. Nga përshtypjet e tyre për këtë 20-vjetor del se “Epoka e re” ishte një shkollë e gazetarisë, por unë do ta quaja universitet për profesionin e gazetarisë. “Epoka e re” në gjithë këtë rrugëtim është treguar gazetë e guximshme, e pathyeshme dhe pandalshme në misionin e saj madhor të informimit të së vërtetës për opinionin.

“Epoka e re” për këto vite ka trajtuar tema të rëndësishme të karakterit politik, ekonomik, social, kulturor dhe sportiv. “Epoka…” vazhdon të mbetet një gazetë që u jep hapësirë për mendime të gjitha palëve, kudo që ka shqiptarë.

Sigurisht se për ekzistimin e saj deri më sot merita ka botuesi Muhamet Mavraj dhe lexuesit e saj fanatikë, tek pastaj ne që jemi pjesë e saj dhe ata që ishin më herët. “Epoka e re” deri sot ka ecur vetë, me vetëfinancim, me ata që e blejnë dhe me reklamimin që bëjnë disa kompani që nuk janë ndarë nga “Epoka…”.

Krahas versionit të shkruar, “Epoka e re” është edhe në platformën online, ku edhe në këtë platformë është duke dhënë kontribut të çmuar në bërjen e gazetarisë së pavarur, duke mos u lëshuar në lajme të rreme vetëm sa për të fituar nga klikimet.

Sot në Kosovë nuk është lehtë që fillikat, pa ndihmën e askujt, të botosh një gazetë dhe t’ia festosh ditëlindjen e 20-të. Këtë e ka bërë Muhamet Mavraj. Si çdo kompani, edhe “Epoka e re” në këtë rrugëtim të saj medial, po flas për 13 vjet sa jam pjesë e saj, ka pasur sfida, por që janë tejkaluar. Kur ka vullnet dhe sinqeritet në punë çdo pengesë tejkalohet.

“Epoka e re” për mua është shtëpi e dytë, ku më së shumti e kaloj kohën. Më ka mësuar shumë profesionalisht, por edhe unë i kam qëndruar besnik për këto 13 vjet. Të jesh pjesë e një mediumi që ka vlera kombëtare është krenari.

Në “Epokën e re” bëra shumë miq e shumë shokë. Në “Epokën e re” takova edhe personin e jetës, gazetaren Qendresa Rama, me të cilën sot kemi një vajzë të mrekullueshme, Junën.

Uroj të festojmë edhe shumë ditëlindje të tjera të “Epokës së re”!.