Presidenti turk, Recep Tayyip Erdogan tha sot se kishte urdhëruar Ministrinë e Jashtme që dhjetë ambasadorë perëndimorë t’i shpallë “persona non grata”, përkatësisht persona të padëshiruar.

Ai e mori këtë vendim për shkak të thirrjes për lirimin e filantropistit, Osman Kavala, raportoi reuters.

Kavala ndodhet në burg që nga fundi i vitit 2017 dhe akuzohet për financimin e demonstratave në të gjithë vendin në vitin 2013 dhe për përfshirje në një grusht shteti të dështuar në vitin 2016. Ai mohon të gjitha akuzat.

Në një deklaratë të përbashkët më 18 tetor, ambasadorët e Kanadasë, Danimarkës, Francës, Gjermanisë, Holandës, Norvegjisë, Suedisë, Finlandës, Zelandës së Re dhe Shteteve të Bashkuara bënë thirrje për një “zgjidhje të drejtë dhe të shpejtë të çështjes së Kavalës”.

Ata janë thirrur në Ministrinë e Jashtme, e cila e ka cilësuar deklaratën si të papërgjegjshme.

“I dhashë urdhrin e nevojshëm ministrit tonë të jashtëm dhe thashë se çfarë duhet bërë, këta dhjetë ambasadorë duhet të shpallen menjëherë persona non grata. Ju do ta zgjidhni këtë menjëherë”, tha Erdogan në një fjalim para të mbledhurve në Eskisehir në Turqinë veriperëndimore.

Kavala u lirua nga akuzat lidhur me demonstratat vitin e kaluar, por vendimi u anulua këtë vit dhe u kombinua me akuzat në një rast tjetër që përfshin një përpjekje për grusht shteti.

Grupet e të drejtave të njeriut thonë se rasti i tij është një simbol i shtypjes së disidencës në Turqi nën sundimin e Erdoganit.