Presidenti i Türkiye-s, Recep Tayyip Erdoğan, tha se Mali i Zi, si një “pjesë e rëndësishme” e Ballkanit dhe Evropës, jep kontribute të rëndësishme për paqen dhe stabilitetin

Presidenti i Türkiye-s, Recep Tayyip Erdoğan, përsëriti mbështetjen e vendit të tij për procesin e anëtarësimit të Malit të Zi në Bashkimin Evropian (BE), transmeton Anadolu Agency (AA).

“Ne inkurajojmë dhe mbështesim sinqerisht anëtarësimin e plotë të Malit të Zi, aleatit tonë në NATO, në BE”, tha presidenti Erdoğan në një konferencë për media me homologun e tij malazez Milo Gjukanoviç në Istanbul.

Mali i Zi aplikoi për anëtarësim në BE në vitin 2008 dhe iu dha statusi i kandidatit në dhjetor 2010. Negociatat e anëtarësimit filluan në qershor 2012.

Erdoğan tha se Türkiye i kushtoi vëmendje të veçantë ruajtjes së stabilitetit në Evropën Juglindore dhe zhvillimit ekonomik të rajonit, duke shtuar se Mali i Zi, si një “pjesë e rëndësishme” e Ballkanit dhe Evropës, jep kontribute të rëndësishme për paqen dhe stabilitetin.

“Marrëdhëniet midis Türkiye-s dhe Malit të Zi janë në nivelin më të lartë”, theksoi Erdoğan, duke shtuar se të dy vendet ndajnë një histori dhe kulturë të përbashkët, si dhe lidhje të forta midis njerëzve.

Ai shtoi se të dy vendet synojnë të arrijnë një vëllim tregtar dypalësh prej 250 milionë dollarësh.

“Totali i investimeve turke në Mal të Zi tejkaloi 67 milionë dollarë. Numri i kompanive investuese turke është 3.800. Ky është sigurisht një hap shumë i rëndësishëm”, tha Erdoğan.

Ai shtoi se Agjencia Turke për Bashkëpunim dhe Koordinim (TIKA) ka kryer më shumë se 400 projekte dhe aktivitete në Mal të Zi me një vlerë totale prej më shumë se 20 milionë euro.

Nga ana tjetër, Gjukanoviç tha se në takim me presidentin Erdoğan u diskutuan disa çështje, duke përfshirë ekonominë dhe mbrojtjen.

Ai theksoi nevojën që të dy vendet të përdorin potencialet e tyre ekonomike.

Duke vlerësuar lartë presidentin Erdoğan për përpjekjet e tij ndërmjetësuese midis Rusisë dhe Ukrainës që kur shpërtheu lufta mes tyre në shkurt, Gjukanoviç u shpreh se “ka respekt të madh për zotin Erdoğan për kontributet e tij”.