Turqia planifikon të mbajë samit me Francën, Gjermaninë dhe Rusinë në fillim të shtatorit, për të diskutuar lidhur me konfliktin sirian dhe çështje të tjera rajonale, ka bërë me dije presidenti turk, Rexhep Taip Erdogan.

Në komentet e publikuara nga mediet turke, Erdogani citohet të ketë thënë se ky takim pritet të mbahet në Stamboll më 7 shtator.

Megjithatë, lideri turk nuk ka dhënë detaje për çështjet që pritet të jenë në agjendën e këtij takimi, por ai ka thënë se Turqia do të vazhdojë dialogun me Rusinë edhe përtej këtij takimi.

Qeveritë në Moskë, Paris dhe Berlin ende nuk e kanë konfirmuar mbajtjen e këtij samiti.

Rusia së bashku me Iranin, mbështesin presidentin sirian Bashar al-Assad në luftën shtatë vjeçare në Siri, ku janë vrarë qindra mijëra persona dhe miliona të tjerë janë detyruar të largohen nga shtëpitë e tyre, raporton “Rel”.

Turqia, Franca dhe Gjermania, në konfliktin sirian mbështesin grupe të ndryshme rebele.