Presidenti i Turqisë, Rexhep Taip Erdogan, ka diskutuar të premten për lidhjet dypalëshe dhe çështje të tjera me kryeministrin Albin Kurti në kompleksin presidencial në Ankara, ka njoftuar Drejtoria e Komunikimeve të Turqisë.

Në pritjen e cila ka zgjatur 1 orë e 50 minuta, ishin të pranishëm edhe nënpresidenti Cevdet Yilmaz dhe ministri i Mbrojtjes Kombëtare, Yashar Gyler.

Siç ka njoftuar zyra për informim e Presidencës turke, gjatë takimit është diskutuar për marrëdhëniet Turqi-Kosovë, konfliktin Izrael-Hamas, si dhe problemet rajonale dhe globale.

“Gjatë takimit, presidenti Erdogan theksoi rëndësinë e rritjes së vëllimit tregtar mes Turqisë dhe Kosovës, me synimin që të kalojë 1 miliard dollarë, e cila aktualisht është në rreth 750 milionë dollarë. Ai gjithashtu theksoi potencialin për rritje shtesë në sektorë të ndryshëm, veçanërisht në industrinë e mbrojtjes”, është thënë në njoftim.

Sipas këtij njoftimi, presidenti turk shprehu përkushtimin e Turqisë për të vazhduar mbështetjen e Kosovës në të gjitha fushat.

“Ai po ashtu përmendi se Kosova pritet të ndërmarrë veprime, veçanërisht në fushën e kundër-terrorizmit. Ai vuri në dukje se zbutja e tensioneve ndërmjet Kosovës dhe Serbisë është një zhvillim pozitiv, por është thelbësore të shihet përparim i prekshëm në zgjidhjen e kësaj çështjeje”,  është thënë në këtë njoftim.