Christian Eriksen është rikthyer te kombëtarja në mënyrën e tij më të mirë. Pas 9 muaj që nga ai momenti i tmerrshëm që ndodhi me të në Kampionatin Evropian, ish-mesfushori i Interit, gjeti rrugën e rrjetës vetëm 2 minuta pasi hyri në fushën e lojës.

Edhe pse kombëtarja e tij u mposht 4-2 nga Holanda, ajo që gëzoi më shumë tifozët ishte Eriksen i cili në momentin që shkeli fushën e gjelbër i gjithë stadiumi e duartrokiti, duke i dhënë mbështetje Eriksenit.

Me golin ë mbrëmshëm mesfushori i Brentfordit shënoi golin e 36-të me kombëtaren daneze në  ndeshjen e tij të 110-të.

“Nuk mund të them se sa më ka munguar kjo ndjenjë”, ka shkruan Eriksen në “Instagram” me një foto nga festimi i golit të tij.

Në një intervistë për mediat pas ndeshjes së luajtur në Amsterdam, në të cilën ai kaloi disa vite si lojtar i Ajaxit, ai komentoi ndeshjen.

“Ndjeva mirëpritjen e tifozëve holandezë. Kam luajtur këtu për vite, sigurisht që ata më njohin, por ishte një mënyrë e bukur që më mirëpritën. Jam i lumtur për golin, kjo ishte mënyra e përsosur për t’u rikthyer në kombëtare. Tani po pres me padurim Kupën e Botës në Katar, por ka ende shumë për të luajtur dhe unë jam i fokusuar”, ka përfunduar ai.

Can’t say how much I’ve missed this feeling! ❤️??#ce10 pic.twitter.com/4QLOCs2UIu

— Christian Eriksen (@ChrisEriksen8) March 26, 2022