![](https://www.epokaere.com/wp-content/uploads/2023/08/escobari.jpg)
Escobar: ShBA-ja zgjedh si partnerë ata që tregojnë përkushtim ndaj NATO-s dhe e afrojnë rajonin me BE-në
I dërguari special i ShBA-së për Ballkanin Perëndimor, Gabriel Escobar, ka treguar se kë e zgjedhin për partnerë në Ballkan e kë jo.
Sipas Escobarit, ShBA-ja zgjedh si partnerë në Ballkan të gjitha vendet që e afrojnë rajonin me BE-në.
“Doja ta bëja të qartë se SHBA-ja zgjedh si partnerë në Ballkan ata që e afrojnë rajonin me Evropën, ata që tregojnë përkushtimin e tyre ndaj NATO-s dhe që vazhdojnë luftën kundër korrupsionit. Kjo është pritshmëria jonë”, tha ai për mediumin maqedonas 360°, transmeton Klankosova.tv.
Tutje, Escobar tha se për të gjithë rajonin e Ballkanit, korrupsioni është një problem i madh, teksa shtoi se ekziston një arsye tjetër pse ShBA-ja do ta shoh rrugën evropiane të hapur për të gjitha vendet.
“Çdo vend që ka hyrë në BE është më i qëndrueshëm, më demokratik dhe më i avancuar, dhe në të njëjtën kohë më i drejtë për sa i përket drejtësisë për qytetarët e tij. Kjo është një arsye tjetër pse ne duam t’ju shohim në rrugën e anëtarësimit në BE”, tha ai.
Po ashtu, Escobar paralajmëroi edhe emra të rinj të biznesmenëve e politikanëve me fuqi në Ballkan të cilët do të hyjnë në listë të zezë.
“Më lejoni të them vetëm se kjo administratë, administrata Biden, është e përkushtuar për të luftuar korrupsionin. Sepse korrupsioni është kaq gërryes për shoqëritë. Nuk mund të bëjmë një njoftim për sanksione, por të jeni të sigurt që do të ketë”.