Rexhep Selimi është optimist dhe shpreson që drejtësia të triumfojë, thotë mbrojtja e tij në Gjykatën Speciale në Hagë, Geoffrey Roberts. Çështja e Zyrës së Prokurorit të Specializuar zyrtarisht mbyllet më 15 prill, dhe më pas mbrojtja pritet të kërkojë rrëzimin e akuzave.

Edhe pritjet e avokatit janë pozitive në kohën kur Zyra e Prokurorit të Specializuar ka mbërritur në përfundim të çështjes së saj në rastin ndaj Hashim Thaçit, Kadri Veselit, Jakup Krasniqit e Rexhep Selimit.

“Marrja e një vendimi do kohë, por që në fund do të rezultojë me vendimin që ne shpresojmë”, tha avokati para gazetarëve në Hagë.

“Mendoj se çdo njeri që është i ndaluar, larg familjes së tij për katër vjet e gjysmë, do të ketë një ndikim të rëndësishëm në jetën e tij. Ai është arrestuar në fillim të nëntorit 2020, por ka ndjekur procedurat, ka marrë pjesë në çdo seancë gjyqësore, ka ndjekur dhe ka bashkëpunuar me çdo drejtim nga paneli në gjykatë. Por në një nivel personal, ai është optimist, është pozitiv, ashtu siç jam unë, dhe sigurisht shpreson që drejtësia të ndjekë rrugën e saj. Marrja e një vendimi merr kohë, por që në fund do të rezultojë me vendimin që ne shpresojmë”, tha ai.

Rexhep Selimi, sikurse ish-krerët e tjerë të UÇK-së, po përballen me një proces të tejzgjatur gjyqësor – gati pesë vjet në paraburgim.

Gjykimi ndaj tyre ka nisur në prill të vitit 2023 ndërkaq, në fillim të kësaj jave, prokuroria përfundoi me dëshmitarit e saj duke i hapur kështu rrugë mbrojtjes.

Për dy vjet, prokuroria i solli 125 dëshmitarë në sallë, por asnjëri nuk akuzoi drejtpërdrejt Selimin.

“Nuk mund të përmend, natyrisht, atë që është thënë në seancat private nga ndonjë dëshmitar. Keni të drejtë që akuzat lidhen me një ndërmarrje të përbashkët kriminale dhe ka shumë pak që i referohen drejtpërdrejt zotëri Selimit, por nuk mund, më vjen keq, të komentoj akuzat apo provat individuale që janë dhënë në seancat private”, tha mbrojtja e Selimit para gazetarëve.

Çështja e ZPS-së, zyrtarisht mbyllet më 15 prill, dhe më pas mbrojtja do të kërkojë rrëzimin e akuzave.

“Momentalisht nuk kemi marrë ndonjë vendim nëse do të kemi nevojë të thërrasim dëshmitarë të mbrojtjes, nëse po, sa dëshmitarë do të nevojiten ose kush do të jenë ata. Siç e dini, ky është një proces kundërshtues, barra bie mbi prokurorinë për të provuar akuzat përtej çdo dyshimi të arsyeshëm dhe kemi këtë proces fillimisht, procesin e Rregullës 130, ku do të kundërshtojmë akuzat dhe të kërkojmë gjykatës që të tërheqin disa ose të gjitha ato akuzat. Vetëm pasi të ketë marrë një vendim gjykata, ne do të mund të marrim një vendim nëse kemi nevojë të thërrasim dëshmitarë të mbrojtjes dhe nëse po, kush dhe sa dëshmitarë… Ne kemi një proces në gjykatë sipas Rregullës 130, ku në fund të rastit të prokurorisë, që siç e dini po afrohet më 15 prill, ne mund të tregojmë para gjykatësve se do të paraqesim një kërkesë për heqjen e disa ose të gjitha akuzave. Ky është një proces që ne po shqyrtojmë aktualisht, po diskutojmë me ekipet e tjera dhe sigurisht do të jemi të gatshëm të veprojmë nëse është diçka që duam të bëjmë”, tha ai.

“Vendimi për atë që do të kërkojmë të tërhiqet, është diçka që do të diskutojmë dhe do të ngritim. Akuzat ose vetë rregulli i referohen akuzave specifike, besoj, dhe ato do të jenë ato që ne do të kërkojmë të tërhiqen, kështu që kjo është ajo që do të përqendrojmë kërkesën tonë”, shtoi ai kur u pyet nëse do të kërkojnë tërheqjen e një pike ku UÇK-ja quhet “ndërmarrje e përbashkët kriminale”.

Avokati theksoi edhe sasinë e provave me shkrim që janë paraqitur për çka tha se kjo është një çështje që duhet adresuar – se çfarë peshe duhet t’iu jepet dëshmive që nuk janë paraqitur drejtpërdrejt nga individët.

“Mendoj se rasti i prokurorisë ishte, siç thashë në fillim, kishte shqetësime që kam shprehur për këtë rast. Këto shqetësime nuk janë zbutur nga rasti. Në fakt, jam po aq i sigurt në ato boshllëqe dhe ato probleme sa isha në fillim. Mendoj se mënyra se si është paraqitur rasti ka qenë nganjëherë e paqartë. Dhe kjo ka qenë një çështje e ngritur në gjykimin në një nga konferencat statusore. Se nuk është paraqitur gjithmonë në një mënyrë koherente dhe të qëndrueshme. Dhe kështu, nëse përdorni fjalën e dobët ose ndonjë fjalë tjetër, ka probleme me këtë rast të cilat ne jemi të sigurt që do të rezultojnë, siç thashë, në një rezultat pozitiv. Po, mendoj se një nga çështjet më të mëdha që do të doja të ngrija është sasia e provave që është paraqitur në këtë rast në format shkrimi. Sigurisht, nëse një dëshmitar është aty në gjykatë, mund ta pyetni dhe ta sfidoni. Nëse deklarata vjen, nuk mund ta përball t’i bësh pyetje një cope letër. Dhe kështu, kjo është një çështje që mendoj se duhet adresuar. Dhe sa peshë duhet t’i jepet atyre dëshmive që nuk janë paraqitur drejtpërdrejt nga individët, kjo do të jetë një pyetje për gjykatësit qe ta përcaktojnë në kohën e duhur”, tha ai.

Mbrojtja u pyet edhe nëse do të kërkojë që regjimi për vizitat në qendrën e paraburgimit të ndryshojë për Selimin, pas përfundimit të dëshmitarëve të prokurorisë.

“Çështja e regjimit të paraburgimit të zotëri Selimit është një çështje që është e rëndësishme për ne dhe për familjen dhe miqtë e zotëri Selimit, ata që e vizitojnë. Sigurisht, është diçka që shpresojmë se do të shohim një ndryshim deri në fund të rastit të prokurorisë, kjo është një çështje me panelin e gjyqtarëve, kjo është për ata të vendosin. Sigurisht, në fund të rastit të prokurorisë, kur nuk ka më dëshmitarë të prokurorisë, ne do të sugjeronim që ky të ishte një ndryshim rrethanash që mund të çojë në një ndryshim regjimi, por i takon panelit që të vendosë”, tha ai.

Por çka tha Roberts, a do të kërkojë mbrojtja lirim të përkohshëm, pasi të mbyllet çështja e prokurorisë?

“Kjo është një pyetje e ngjashme, ne po e shqyrtojmë gjithashtu, se janë dy vjet prova të prokurorisë, kemi dëgjuar të gjithë dëshmitarët e tyre, nuk kemi më dëshmitarë të drejtpërdrejtë. Ende kemi disa dokumente të tjera që prokuroria po përpiqet t’i pranoj, por në këto rrethana, sigurisht, gjykata të tjera kanë lejuar individë të lirohen përkohësisht në faza të caktuara të procedurave. Kjo është një nga ato faza kur mund të paraqitet një kërkesë, nuk po presim që viktimat të paraqesin çështjen e tyre për disa muaj, ndoshta më pak, është e vështirë të dihet. Shpresojmë që do të kemi një konferencë statusore në të ardhmen e afërt pas përfundimit të rastit të prokurorisë, kur do të jemi në gjendje të përcaktojmë një orar për atë që do të ndodhë për pjesën tjetër të çështjes së viktimave dhe më pas ndoshta për mbrojtjen nëse është e nevojshme. Në atë moment, shpresojmë që do të jemi në një pozicion më të mirë për të ditur nëse lirim i përkohshëm do të ishte diçka që mund të ishte e mundur ose jo”, tha ai.

Roberts gjithashtu dha shpjegime edhe për atë pse katër ekipet mbrojtëse mund të thërrasin ndaras dëshmitarët.

“Ne të gjithë kemi të akuzuar të ndryshëm që përfaqësojmë, kemi interesa të ndryshme. Sigurisht, aktakuza i përmend të gjithë ata dhe ata janë përmendur së bashku si pjesëmarrës të supozuar në një ndërmarrje të përbashkët kriminale. Ne do të kemi strategjinë tonë, qasjen tonë. Disa prej dëshmitarëve që mund të thirren do të jenë të dobishëm për të gjithë ekipet e mbrojtjes nëse këta dëshmitarë thirren. Disa mund të lidhen vetëm me një ekip të mbrojtjes. Por sigurisht kemi interesa që përkojnë, por jo gjithmonë janë të njëjta interesa apo lloje të njëjta dëshmish që mund të na nevojiten për të kundërshtuar”, tha ai.

Megjithatë, mbrojtja e Selimit bëri të ditur se katër ekipet mbrojtëse kanë bashkëpunim mes vete.

Hashim Thaçi, Kadri Veseli, Jakup Krasniqi e Rexhep Selimi po mbahen në qendrën e paraburgimit në Hagë prej vitit 2020.

Ata akuzohen për krime të pretenduara të luftës, akuza për të cilat secili prej tyre është deklaruar i pafajshëm.