Misioni i Bashkimit Evropian për Sundimin e Ligjit në Kosovë (EULEX) do të ketë përgjegjësi ekzekutive të kufizuara, edhe pas përfundimit të mandatit në mes të qershorit.

Këto përgjegjësi, do të jenë në fushën e mbrojtjes së dëshmitarëve, përkrahjen e punës së Dhomave të Specializuara dhe të Zyrës së Prokurorit të Specializuar.

Një gjë e tillë është bërë me dije nga Këshilli i BE-së në vendimin e marrë gjatë ditës së sotme.

“Vendimi i sotëm i jep fund pjesës ekzekutive të mandatit të misionit: Kosova do të marrë përgjegjësinë për të gjitha hetimet, përndjekjet dhe gjykimet” është thënë në komunikatë e këtij këshilli.

Misioni i ri i EULEX-it do të jetë i fokusuar në këto pika: Monitorimin e rasteve të caktuar dhe gjykimeve, monitorim, mentorim dhe këshillim për Shërbimin Korrektues dhe mbështetjen operacionale për implementimin e marrëveshjeve të arritura në dialogun Kosovë – Serbi.

Mandati i rishikuar, që zgjat deri më 14 qershor të vitit 2020, do të mbështetet me një buxhet prej 169 milionë euro.