Mijëra zjarrfikës po vazhdojnë të luftojnë zjarret në Portugali, Spanjë dhe Francë, pasi vala e të nxehtit nuk tregon shenja lehtësimi.

Në Portugalinë veriore, një pilot vdiq kur avioni i tij bombardues u rrëzua në zonën Foz Coa, pranë kufirit spanjoll.

Autoritetet portugeze thonë se të paktën 238 persona kanë vdekur nga të nxehtit gjatë javës së kaluar.

Zjarret po shkatërrojnë zonat e rajonit jugperëndimor të Francës Gironde, ku mbi 12,000 njerëz janë evakuuar, transmeton Klankosova.tv.

Valët e të nxehtit janë bërë më të shpeshta, më intensive dhe zgjasin më gjatë për shkak të ndryshimeve klimatike të shkaktuara nga njerëzit. Bota tashmë është ngrohur me rreth 1.1 shkallë celzius që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha në emetimet e karbonit.

Shërbimi francez i motit ka parashikuar temperatura deri në 41 gradë në pjesë të jugut të vendit të dielën dhe rekorde të reja të të nxehtit parashikohen për të hënën.

Të shtunën vonë, vendi vendosi 22 departamente të tjera rajonale, kryesisht përgjatë bregut të Atlantikut, në alarm të lartë portokalli.

Një banore në Francën jugperëndimore i përshkroi zjarret në pyje si ndjesi “post-apokaliptike” – “Unë kurrë nuk e kam parë këtë më parë,” tha Karyn, e cila jeton pranë Teste-de-Buch, për agjencinë e lajmeve AFP.

Ministri i Brendshëm Gerald Darmanin tha se zjarret deri më tani kishin djegur 10,000 hektarë tokë dhe vlerësoi “guximin e jashtëzakonshëm” të zjarrfikësve.

Ndërkohë në Alpe alpinistëve u kërkohet të shtyjnë udhëtimet e tyre në Mont Blanc për shkak të rrezikut të rënies së shkëmbinjve të shkaktuar nga “kushtet e jashtëzakonshme klimatike”.

Që nga e marta, temperaturat janë rritur në 47 gradë Celsius në Portugali dhe mbi 40 gradë Celcius në Spanjë, duke e lënë të thatë fshatin dhe duke ndezur zjarret.

Parashikuesit portugez të motit thonë se temperaturat do të vazhdojnë të lëvizin mbi 40 gradë Celsius përpara se të bien javën e ardhshme.

Pikat e nxehta të zjarrit të Portugalisë janë në veri-lindje të qytetit të Portos. Zjarret kanë shkatërruar 30,000 hektarë (75,000 hektarë) tokë këtë vit – zona më e madhe që nga vera e vitit 2017, kur Portugalia pësoi zjarre shkatërruese në të cilat vdiqën rreth 100 njerëz.

Në Spanjën jugore, pushuesit në plazhin e Torremolinos panë shtëllunga të mëdha tymi që ngriheshin në kodra, ku disa avionë po luftonin zjarrin.

Pjesë të tjera të Mesdheut janë prekur gjithashtu. Në Itali, qeveria ka shpallur një gjendje të jashtëzakonshme në luginën e tharë të Po-s – lumi më i gjatë i vendit nuk është më shumë se një rrjedhë në disa vende.

Në Greqi, zjarrfikësit po merren me flakët në zonën e Ferizës, rreth 50 km (31 milje) në jug-lindje të Athinës dhe pranë Rethymno, në bregun verior të Kretës. Shtatë fshatra janë evakuuar pranë Rethymnos.

Në veri të Marokut, disa fshatra duhej të evakuoheshin pasi zjarret përfshin provincat Larache, Ouezzane, Taza dhe Tetouan. Një fshat u shkatërrua plotësisht në zonën e Ksar El Kebir dhe të paktën një person vdiq nga flakët, transmeton Klankosova.tv.