Kryetari i Komunës së Skenderajt, Bekim Jashari, vlerëson se zgjedhjet nuk do të ishin zgjidhje për vendin. Jashari në Edicionin Special në Klan Kosova ka thënë se nuk e sheh të unifikuar mjaftueshëm spektrin politik.

“Si shtet, që nga paslufta s’kemi qenë në krizë më të thellë qoftë ekonomike, qoftë politike, por edhe ‘vëllazërore’ si popull shqiptar që jemi. Spektri politik nuk është i unifikuar. Shfrytëzoj rastin, si anëtar i familjes Jashari, t’u bëj ftesë liderëve politikë, që të jenë më të matur, më të kujdesshëm në situatën që jemi, sepse nuk mendoj se zgjedhjet do të na zgjidhin problemin e postit të presidentit.

Mendoj se edhe pas zgjedhjeve sërish do të jemi në situatën e njëjtë, nëse s’kanë konsensus dhe marrëveshje mes vete. Po shpresoj që ta gjejnë gjuhën e përbashkët dhe të bëhet zgjidhja”, ka thënë ai.

Në anën tjetër, është përfolur edhe emri i Murat Jasharit, nip i komandantit legjendar Adem Jashari, si kandidat i mundshëm për president të Kosovës. Për këtë, Jashari ka shprehur gatishmërinë e kësaj familje që të kandidojë për president të Kosovës nëse është e nevojshme.

“Në situatën që jemi tani nga dorëheqja e Thaçit deri më sot, s’ka asnjë kontakt nga asnjë subjekt politik ose lider politik, qoftë me Muratin ose me mua për këtë temë.

E kam thënë edhe një herë, ne anëtarët e gjallë të familjes Jashari nuk është që iu frikësohemi përgjegjësive në momente të caktuara, sepse kemi treguar edhe në të kaluarën që dimë dhe mund të kontribuojmë kur ka nevojë vendi. Unë besoj se nëse vjen deri në atë pikë, që i gjithë spektri politik dakordohen që të propozojnë një kandidat nga familja jonë, ne do të marrim përgjegjësi.

Për fat të keq është cituar familja Jashari vetëm kur kanë pasur nevojë qoftë në zgjedhje ose situata të vështira kur kanë qenë. Por, kur kanë qenë, siç thotë populli, ‘shlirë, pa asnjë telashe’, kanë harruar të vijnë në vizitë, e lëre më shumë”, u shpreh Jashari.