Një nga ekspertët kryesorë për koronavirusin në Shtetet e Bashkuara, Anthony Fauci, ka thënë se është optimist se vaksina kundër Covid-19 mund të gjendet në kohë rekorde.

Duke folur në një intervistë për “Zërin e Amerikës”, Faucci, drejtor i Institutit Kombëtar të ShBA-së për Alergji dhe Sëmundje Infektive, ka theksuar se provat e hershme të disa vaksinave kanë qenë pozitive.

Kompania amerikane “Moderna” ka testuar tashmë një vaksinë eksperimentale dhe ka thënë se ajo ka dhënë shenja premtuese. “Po, jam optimist se do të kemi vaksinë brenda një periudhe të arsyeshme kohore jo vetëm nga kompania ‘Moderna’, por edhe nga të tjera. Jemi të përfshirë në bashkëpunim me disa kompani. Arsyeja që jam optimist është se në provat e hershme te njerëzit dhe te kafshët, rezultatet kanë qenë të favorshme. Nëse kemi vaksinë të suksesshme, mendoj se shumica e njerëzve do ta marrin, qoftë përmes zyrës së mjekut të tyre, përmes farmacive apo qendrave të shpërndarjes”, ka deklaruar Faucci.

Dhjetëra kompani farmaceutike janë në garë për gjetjen e vaksinës kundër koronavirusit, i cili ka prekur mbi 7.4 milionë njerëz në botë.