Astrit Fazliu ka konfirmuar se Feronikeli edhe ndaj Llapit do ta kërkojë fitoren në Podujevë.

Një nga futbollistët kryesorë të Feronikelit në këtë kampionat, Astrit Fazliu, ka thënë për “Epokën e re” se skuadra lidere e IPKO Superligës udhëton të mërkurën për fitore në Podujevë. Llapi dhe Feronikeli të mërkurën nga ora 16:00 në stadiumin “Zahir Pajaziti” e zhvillojnë derbin e javës së parafundit në këtë edicion garash. “Ne jemi mirë të përgatitur për ndeshjet e fundit. Të gjithë e dimë rëndësinë e pikëve si për ne, po ashtu edhe për Llapin, por Feronikeli si në çdo ndeshje tjetër udhëton për fitore. Kundërshtari ka skuadër cilësore dhe do të jetë ndeshje e vështirë për të dy klubet dhe interesante për publikun”, ka thënë Fazliu, i cili ka konfirmuar se “Nikli” në këtë ndeshje nuk do të ketë mungesa.

Ish-sulmuesi i Prishtinës dhe disa skuadrave të tjera në Kosovë e Shqipëri ka thënë se ndeshja që zhvillohet në Drenas në mes të Feronikelit dhe Prishtinës mund të jetë përcaktuese për titullin e kampionit për edicion 2018/19. “Është mirë që ne luajmë si vendës ndeshjen e fundit kundër Prishtinës në Drenas. Ajo ndeshje mund të jetë përcaktuese për titull të kampiones në Superligë”, ka deklaruar Fazliu.

Feronikeli aktualisht është në pozitën e parë, me dy pikë më shumë se skuadra e Prishtinës që pozicionohet e dyta në renditjen tabelore, kurse Llapi është në pozitën e tretë me pesë pikë më pak. Skuadra e Feronikelit ka pasur një sezon fantastik deri më tash, pasi është kualifikuar edhe në finale të Kupës, ku përballet me skuadrën e Trepçës ’89, më 25 maj në stadiumin “Fadil Vokrri” në Prishtinë. Ndërsa të mërkurën do të zhvillohen edhe tri ndeshje të tjera dhe takohen: Prishtina-Trepça ’89, Drita-Flamurtari dhe Drenica-Ballkani.

/Veton ZYMBERI/