Komisioni i Garave i Federatës së Basketbollit të Kosovës (FBK) bëri të ditura dënimet për finalistët e Superkupës së Kosovës. Finalja e Superkupës së Kosovës u karakterizua me incidente të shumta, incidente këto që i detyruan të reagojnë organet kompetente për dhunën e shfaqur nga tifozët.

Pas shqyrtimit, KG i FBK-së ka marrë vendim që të dënojë Sigal Prishtinën dhe Trepçën me nga 2 000 euro. Por, ky nuk është dënimi i vetëm për Sigal Prishtinën, pasi që bardhekaltrit janë suspenduar me një ndeshje pa shikues. Kjo gjë vjen si pasojë e ndezjes së mjeteve piroteknike në parket ose në afërsi, të cilat ndërprenë ndeshjen për 15 minuta. Ndërkaq, dënimet me nga 2 000 euro secila skuadër i merr si pasojë e shkeljes së neneve 49.4 (600 euro), 49.7 (400 euro) dhe 49.9 (1 000 euro). Neni 49.4: Hedhja e gjësendeve të forta që mund të shkaktojnë lëndime të rënda dhe dënohet me 600 euro.

Neni 49.7: Animi dhe sjellja josportive e shikuesve ndaj policisë, sigurimit, institucioneve, FBK-së, etj. dënohet me 400 euro. Neni 49.9: Largimi në zhveshtore pas vërejtjes së parë nga gjyqtari i parë (5-minuta) dënohet me 1 mijë euro.