Komuna e Skenderajt ka angazhuar kompaninë e kontraktuar për mirëmbajtje të hapësirave publike, që të bëjë pastrimin e lumit “Klina”, aksion ky që ka nisur nga ura në rrugën “Ilaz Kodra”, e që do të vazhdojë në të dy drejtimet, deri të pastrohet i tërë shtrati i lumit, nga mbetjet dhe papastërtia.

Kryetari i Skenderajt, Bekim Jashari, në llogarinë e vet në “Facebook”, ka bërë me dije se puna në pastrimin e këtij lumi do të vazhdojë edhe gjatë ditëve të ardhshme, duke kërkuar vëmendje nga qytetarët, që ta ruajnë më shumë këtë pasuri natyrore.

“Ka nisur dhe do të vazhdojë ditëve në vijim puna për pastrimin e shtratit të lumit ‘Klina’, prej mbeturinave të hedhura nga njeriu, për fat të keq, që në mungesë të vëmendjes dhe trajtimit çfarë kërkon lumi ynë – si pasuri natyrore, po i shkaktojmë ambientit dëme të mëdha, dëme këto të cilat ne të tashmit dhe gjeneratat që do të vijnë, do t’i paguajmë shtrenjtë. Lumi ‘Klina’ aktualisht ndodhet pa ujin e mjaftueshëm, në këtë stinë të verës dhe thatësirës, andaj kërkoj kujdes shumë të madh, nga të gjithë qytetarët pa dallim, që ta ruajmë këtë pasuri si sytë e ballit”, ka shkruar Jashari.

/Epoka e re/