Një nga ndërtesat që konsiderohej si më e shëmtuara në kryeqytet ka filluar procesin e renovimit. Kjo ndërtesë, që strehon qindra banorë, kishte ndikuar negativisht në pamjen e qytetit, veçanërisht te hyrja e njohur si rrethi me flamur. Zyrtarët e Komunës së Prishtinës zotohen se projekti i renovimit premton një transformim të rëndësishëm për këtë zonë.

Ky projekt, i cili ka një vlerë mbi 500 mijë euro, synon të përmirësojë pamjen dhe kushtet e jetesës për qindra familje që jetojnë në këtë hapësirë.

Nënkryetari i Komunës së Prishtinës, Alban Zogaj në një intervistë për Telegrafin, ka shpalosur detaje nga projekti.

“Po ishte një lajm të cilin ne me të vërtetë e kemi dhënë me gëzim, për arsye se që një kohë jemi duke e planifiku me e rregullu këtë hapësirë. Ka qenë një ndërtesë e papërfunduar me një pamje të papëlqyeshme, sidomos në hyrje të Prishtinës, andaj ka qenë edhe premtim i kampanjës tonë edhe i kryetarit Rama. Kështu që tash jemi gati me fillu me punë. E kemi nënshkruar një kontratë e cila është mbi 500 mijë euro, ku fillohet faza e parë e renovimit apo fasadimit të kësaj ndërtese”, tha ai.

Zogaj tregoi se ideja është të bëhet fasadimi nga jashtë,  dhe ta ketë një pamje të mirë, por gjithashtu edhe të izolohet edhe të jetë energji efiçiente në fakt.

Gjithashtu, ai tregoi se do të ndryshojmë edhe do të ndërrojmë dritaret.

“Do të punojmë gjatë këtyre muajve tetor dhe nëntor dhe pastaj varësisht edhe prej motit ka mundësi që të dalim edhe në vitin e ardhshëm pranverë, sepse është ndërtesë e madhe dhe kërkon mjaft punë. Kjo është kjo është prej pasluftës, sepse banorët janë futë në këtë ndërtesë pa qenë e përfundume, pastaj banorët kanë investuar vetë e kanë përfundu me masat e tyre, me thonë kështu me resurset e tyre andaj kurrë nuk është përfundu në tërësi dhe nuk ka as si me thonë pranim teknik”, u shpreh ai.

Nënkryetari Zogaj bëri të ditur se lajmi për nisjen e renovimit është mirëpritur nga banorët e kësaj ndërtese, ndërsa tha se ndërtesa do të merr pamje krejtësisht tjetër dhe do të jetë e bardhë.

“Banorët me kënaqësi shumë të madhe e kanë pritë këtë lajm, sepse për ta do të jetë fantastike. Nuk është vetëm çështje e pamjes, është çështje gjithashtu edhe e izolimit dhe do të do të paguajnë më pak energji elektrike, sepse do ta kenë më të izoluar ndërtesën”.

Zogaj në intervistë foli edhe për projekte tjera të rëndësishme në kryeqytet, ndërsa sa i përket ardhjes së autobusëve të rinj në kryeqytet, ai tha se procesi po vazhdon dhe nuk ka pasur ndonjë pezullim.