Nën organizimin e Ministrisë së Kulturës, Rinisë dhe Sportit, ka filluar turneu i takimeve me të rinjtë nëpër tërë Kosovën, me moton “Rinia është shpresë për vendin”.

Ky turne filloi në takimin me të rinjtë në Shtime, ku mori pjesë edhe Ministri Kujtim Gashi.

Më këtë rast, ministri Gashi ka thënë se kanë filluar turneun e takimeve me të rinjtë tanë, për t’i konsultuar ata për të gjitha programet dhe projektet rinore, por edhe për tema të tjera që preokupojnë si shoqëri, duke filluar nga shkollimi, punësimi, luftimi i dukurive negative, roli në vendimmarrje e deri tek arsyet e largimit të të rinjve nga vendi ynë. “Ishte pajtim i përbashkët se themelimi i Fondit Rinor ka ndikuar dukshëm në mbështetjen e të rinjve dhe organizatave rinore të cilat kanë përfituar në fushat e pjesëmarrjes, edukimit, shëndetit, sigurisë njerëzore, punësimit, sportit, kulturës dhe rekreacionit”, ka thënë Gashi.

Ai ka shtuar se duke shfrytëzuar Fondin Rinor si program i veçantë, i themeluar për t’i mbështetur të rinjtë tanë, përfitimet do të jenë në rend të parë të ta.

Ministri Gashi ka inkurajuar ata të punojnë dhe të angazhohen sa më shumë, e në këtë mënyrë suksesi nuk do t’iu mungojë asnjëherë.

/Epoka e re/