Në zyrat e Federatës së Basketbollit të Kosovës (FBK) është mbajtur konferencë për medie, duke shpalosur hollësitë për organizimin e Final 4 në konkurrencën e femrave. Ky është edicioni i parë dhe historik i kësaj gare, ndërsa do të organizohet në Prishtinë.

Anëtarja e Bordit Drejtues të Ligës Unike, Elvira Dushku, ka thënë se kanë bërë përgatitjet e duhura për organizimin sa më të mirë të kësaj ngjarjeje të rëndësishme. “Liga Unike ka bërë të gjitha përgatitjet e duhura për organizimin e ‘Final 4’. Kjo është hera e parë që organizohet në konkurrencën e femrave, andaj duam që të jetë shembull edhe për herët e ardhshme dhe të jetë një organizim i jashtëzakonshëm”, ka thënë Dushku.

Vlora Braha, kryetare e Klubit të Prishtinës (femrat), ka dhënë hollësi për organizimin në kryeqytetin e Kosovës. “Ne jemi munduar të përgatitemi sa më mirë për ‘Final 4’ të Ligës Unike te femrat. Unë shpresoj se do të shijojmë dy ditë të basketbollit te femrat, duke parë ndeshje shumë të bukura në parket dhe një organizim madhështor. Kjo është hera e parë që e organizojmë dhe sigurisht se duam të fitojmë. Prishtina ka traditë në organizim dhe në fitimin e trofeve. Hyrja do të jetë falas dhe u bëjmë thirrje të gjithë adhuruesve të basketbollit që të vijnë në numër sa më të madh”, ka deklaruar Braha.

Ndërkohë, trajneri i Prishtinës, Fidan Shatri, ka folur sa iu përket pritshmërive të ekipit prishtinas për “Final 4”. “Ne jemi të nderuar që jemi pjesë e Ligës Unike dhe që për herë të parë do të organizojmë ‘Final 4’. Konkurrenca është shumë e fortë. Të katër skuadrat janë shumë të forta. Ne kemi bërë përgatitjet e duhura si ekip. Besoj se do të angazhohemi maksimalisht dhe të fitojmë këtë trofe”, ka deklaruar Shatri. Më pas është nënshkruar marrëveshja për Organizimin e “Final 4”, që do të mbahet më 23/24 mars në Prishtinë dhe është paraqitur logoja zyrtare e kësaj ngjarjeje shumë të rëndësishme. Në gjysmëfinalen e parë do të takohen Penza-Bashkimi, kurse në atë të dytën Prishtina-Flamurtari.

Orari

Më 23 mars takohen:
16:00 Penza-Bashkimi
19:00 Prishtina-Flamurtari

Më 24 mars takohen:
16:00 Ndeshja për vendin e tretë
19:00 Ndeshja finale