Bashkimi Evropian (BE) duhet të ndërmarrë masa për të ndihmuar Finlandën që të ndalë fluksin e emigrantëve përmes Rusisë, ka thënë kryeministri finlandez, Petteri Orpo. Vitin e kaluar, Finlanda ka mbyllur kufirin e saj të gjatë me Rusinë pas rritjes së numrit të personave që hynin në shtet, përfshirë shtetas të Sirisë dhe Somalisë. Helsinki ka akuzuar Moskën se po i përdorë si armë emigrantët kundër tij dhe BE-së. Por, kjo akuzë është hedhur poshtë nga Kremlini. “Ne po përgatisim një legjislacion, por ne na duhen edhe masa nga BE-ja”, tha Orpo, pa dhënë më shumë detaje.

Ai këtë deklaratë e bëri gjatë vizitës që ka zhvilluar së bashku me shefen e Komisionit Evropian (KE), Ursula von der Leyen, në kufirin që Finlanda ndan me Rusinë.

Ndërsa Von der Leyen ka deklaruar se KE-ja po punon ngushtë me shtetet e origjinës së emigrantëve dhe shtoi se pajtohet me qëndrimin e Finlandës.

“Ajo çfarë shohim është se një shtet po instrumentralizon njerëzit e varfër për të ushtruar person ndaj një shteti tjetër, prandaj qartësisht kjo është një çështje e sigurisë”, ka thënë ajo.

Masat për të zgjidhur çështjen e emigrantëve nga Rusia duhet të jenë të tilla që të krijojnë një balancë mes mbrojtjes së sigurisë së kufijve dhe obligimeve ndërkombëtare, ka thënë ajo. Duke ndjekur shembullin e Polonisë dhe Lituanisë në kufijtë e tyre me Bjellorusinë, Qeveria finlandeze po harton një legjislacion që do t’iu lejonte rojeve kufitare të ndalojnë që azilkërkuesit nga Rusia të hyjnë në Finlandë.