Kompania financiare JP Morgan Chase do ta marrë përsipër bankën me probleme të Shteteve të Bashkuara të Amerikës, “First Republic”, nëpërmjet një marrëveshjeje të ndërmjetësuar nga rregullatorët, raportoi BBC-ja të hënën.

Korporata Federale e Sigurimit të Depozitave e konfirmoi rënien financiare të bankës, derisa tha se gjiganti i investimeve do t’i marrë të gjitha depozitat dhe shumicën e aktiviteteve. “First Republic” është banka e tretë amerikane që ka rënë në muajt e fundit, duke shkaktuar frikë për një krizë më të gjerë bankare.

Aksionet e huadhënësit me bazë në San Francisco ranë me më shumë se 75 për qind javën e kaluar, pasi pranoi se klientët i kishin tërhequr 100 miliardë dollarë të depozituara në mars.

Ky rast pason pas kolapsimit të Silicon Valley Bank në mars dhe rënies së huadhënësit amerikan, “Signature Bank”.