Kanë përfunduar dy ndeshjet e sotme të javës së 18-të në Superligën e Kosovës në futboll.

Ballkani ka shënuar fitore të pastër 0:2 në derbin lokal ndaj Suharekës,

Lindon Emërllahu me gol nga distanca në minutën e 15-të kaloi kampionin në fuqi në epërsi.

E Bleart Tolaj e dyfishoi epërsinë në minutën e 69-të, pas një gabimi të mbrojtjes së Suharekës.

Me këtë fitore, Ballkani shkon në pushimin dimëror me 33 pikë në vendin e dytë, shtatë më pak se Drita që prin.

Në anën tjetër, Suhareka mbetet në vendin e pestë me 25 pikë të grumbulluara.

Fitore ka shë1nuar edhe Drita, por që ka hasur në vështirësi të mëdha në shtëpi ndaj Feronikelit ’74.

Gjilanasit kanë triumfuar ngushtë 2:1 me gol në minutat shtesë.

Fillimisht Zekolli ka kaluar Feronikelin 74 në epërsi në minutën e 11-të të ndeshjes, rezultat me të cilin është mbyllur edhe pjesa e parë.

Rron Broja ka barazuar shifrat në minutën e 55-të.

Ndërsa Besnik Krasniqi ka pasur mundësi ta përmbyste rezultatin në minutën e 63-të, por gjuajti jashtë nga pika e 11-metërshit.

E golin e fitores e shënoi Arb Manaj në minutën e dytë shtesë.

Me këtë fitore, Drita e ruan diferencën prej shtatë pikëve me Ballkanin dhe dimëron si kampione në Superligë.

Në anën tjetër, Feronikeli 74 mbetet i fundit me 10 pikë, 10 më pak se zona e shpëtimit dhe e pret punë e madhe në pranverë për ta siguruar mbijetesën.