Kryetari i Federatës së Futbollit të Kosovës, Agim Ademi, ka pritur në takim ambasadorin e Britanisë së Madhe në Kosovë, Ruiari O’Connell. Në këtë takim ishin të pranishëm edhe anëtarja e KE-së, Vjollcë Krasniqi, sekretari i përgjithshëm, Eroll Salihu dhe drejtuesit e grupit të tifozëve “Dardanët”.

Kryetari Ademi i shprehu falënderime ambasadorit O’Connell për mbështetjen që i ka dhënë Kosovës në të gjitha aspektet, e veçmas për përkrahjen e dhënë Përfaqësues së Kosovës në çdo ndeshje që ka luajtur në stadiumin “Fadil Vokrri”.

Ndërkaq, ambasadori O’Connell i përgëzoi drejtuesit e FFK-së për punën e deritashme dhe për sukseset e arritura jo vetëm me Përfaqësuesen A, por edhe me ekipet e tjera të grupmoshave, pastaj për organizimin fantastik të ndeshjeve dhe për sjelljen e shkëlqyeshme të tifozëve. Tutje ambasadori O’Connell e ka vlerësuar si storie të suksesit FFK-në, duke uruar që rezultatet pozitive të Përfaqësues, por edhe klubeve do të vazhdojnë edhe në të ardhmen, teksa ka premtuar se gjithmonë do të jetë afër Përfaqësues së Kosovës, pasi tashmë edhe djali i tij është bërë një fans i madh i “Dardanëve”. Gjatë këtij takimi u bisedua edhe për çështjen e vizave dhe për lehtësimin e procedurave për tifozët dhe stafin për shkuarjen në Angli për ndeshjen e muajit shtator. Gjithashtu temë bisede ishte edhe ndeshja e kthimit në muajin nëntor kundër Anglisë, e ku të dyja palët vlerësuan se është një rast shumë i mirë i promovimit të kulturës dhe mikpritjes së Kosovës për tifozët anglezë. U diskutua edhe për organizimin sa më të mirë të ndeshjeve të klubeve në rast se Feronikeli dhe Prishtina kalojnë në rrethin tjetër të garave evropiane, me ç’rast do të takoheshin me klubet britanike, TNS dhe Glazgou Rangers.

Edhe për këtë çështje ambasadori u shpreh i gatshëm të ndihmojë në lehtësimin e procedurave për pajisje me viza, si dhe njëherësh kërkoi që të bëhet një organizim sa më i mirë edhe nga klubet dhe autoritetet lokale që mikpritja për tifozët të jetë në nivelin më të mirë. Në fund, presidenti Ademi dhuroi një plaketë dhe një fanellë të Përfaqësues për ambasadorin O’Connell, derisa dhuratë për ambasadorin kishte përgatitur edhe kryetari i “Dardanëve”, Lulzim Berisha, për çka ambasadori u shpreh tejet falënderues.