Hansi Flick siguroi këtë të hënë se skuadra është në gjendje të konkurrojë nesër kundër Benfikës, pavarësisht vdekjes së mjekut Carles Miñarro të shtunën e kaluar. Trajneri gjerman, i cili mbajti një qëndrim serioz gjatë gjithë konferencës për shtyp, theksoi se dhoma e zhveshjes është e përqendruar dhe e vetëdijshme për rëndësinë e ndeshjes së kthimit në 1/8-at e finales së Ligës së Kampionëve. Para daljes së tij për mediet, u mbajt një minutë heshtje në nder të mjekut.

Gjendja e ekipit: “Besoj se ekipi po e menaxhon mirë situatën. Është i përqendruar. Ndeshja e parë në Lisbonë ishte e rëndësishme. Ata janë të mirë në tranzicione dhe ua kam shpjeguar këtë edhe lojtarëve”.

Aspekti emocional: “Presidenti erdhi dje në dhomat e zhveshjes dhe foli me lojtarët. Edhe unë kam biseduar me ta. Është një humbje e madhe. Carles ishte një person i madh dhe një mjek i shkëlqyer. Ishte një pjesë e rëndësishme e suksesit tonë. Do të na mungojë shumë. Por ekipi dëshiron të luajë për të. Kjo situatë është shumë e rëndësishme. Jemi të përqendruar për të fituar. Duhet të ecim përpara. Është një moment i rëndësishëm për klubin, për tifozët… duam të bëjmë më të mirën dhe fitorja është thelbësore”.

Lewandowski: “Ai mund të luajë, është në formë të plotë. Para ndeshjes me Osasunën ndjeu disa shqetësime gjatë nxehjes, por tani është mirë”.

Barça, favorite: “Ekipi është shumë i përqendruar, kemi diskutuar për këtë mëngjes në mbledhjen e skuadrës. Kemi parë çfarë kemi bërë mirë në ndeshjen e parë dhe çfarë duhet të përmirësojmë. Askush nuk mendon se gjithçka është e përfunduar dhe kjo për mua është gjëja më e rëndësishme”.

Taktika: “Ata e dinë shumë mirë stilin e tyre të lojës dhe ne e dimë si t’i përballojmë. Nuk besoj se do të ketë ndonjë surprizë”.

Szczesny: “Unë e them gjithmonë, ai është një portier i pjekur, me eksperiencë, i qetë… personaliteti i tij na ndihmon dhe po bën një punë të shkëlqyer”.

Raphinha dhe Topi i Artë: “Nëse luan mirë, dhe po luan mirë… na ndihmon shumë. Është dinamik, shënon shumë gola, ka uri për lojën… di të lëvizë pa top. Është shumë i përqendruar. Jam i lumtur që e kemi me ne dhe që është në një nivel të lartë”.

Një javë e rëndësishme: “Është gjithmonë kështu, edhe java e Bayernit ishte e rëndësishme, kur më pas u përballëm me Real Madridin… të gjitha javët janë të rëndësishme. Jemi në një moment të shkëlqyer. Kemi një humor të mirë dhe kemi besim, dhe duhet ta mbajmë këtë ritëm”.

Benfica: “Ata kanë një ekip me lojtarë shumë të mirë. Kanë një trajner të shkëlqyer. Duhet të jemi të përqendruar 100% dhe më mirë të mos mendojmë për ndeshjen e parë. Duhet ta fitojmë këtë përballje. Në ndeshjet e tyre jashtë fushe në Champions League kanë luajtur shumë mirë, dhe ne duhet të jemi të vëmendshëm për këtë”.

Presioni ndaj kundërshtarit: “Çdo gjë lidhet me mbajtjen e topit, si në sulm ashtu edhe në mbrojtje. Duhet të ushtrojmë presion ndaj kundërshtarit, dhe këtë synojmë të bëjmë”.