Suksesi i çmendur i Barcelonës në “Da Luz” tërboi jo vetëm protagonistët e këtij takimi, por rrëmbeu edhe faqet e para në të përditshmet spanjolle: “Delir”, shkruan “Mundo Deportivo”.

“Të çmendurit”, ishte titulli kryesor i “Sport”. Nuk kishte përjetuar kurrë një përmbysje të tillë as Hansi Flick, trajneri i Barcelonës.

“Ishte një ndeshje e çmendur. Gjëja më e mirë ishte mentaliteti. Ky është futbolli. Kurrë në jetën time nuk kisha përjetuar një kthim si ky. Tani e rëndësishme është të fokusohemi te Valencia, më pas tek Atalanta. Duhet të jeni të qetë dhe të mendojmë se si do të mposhtim Atalantën”, u shpreh Flick.

Nuk mund të mungonte dhe një koment në lidhje me Szczesnyn, por Flick nuk preferoi të drejtojë gishtin nga portieri polak: “Ai bëri disa gabime, por si gjithë të tjerët. Unë nuk flas për situata individuale, por më pas ai bëri disa pritje të rëndësishme. Ne fitojmë së bashku dhe humbasim së bashku”, ka shtuar trajneri i Barcelonës.