Ishte dhjetori i 2012-s.

Në njërin nga lokalet e Prishtinës po diskutohej për viktimat e dhunës seksuale të luftës.

Për këtë temë po fliste humanistja dhe deputetja Flora Brovina.

“Unë do të jua tregojë fotografinë, dmth njerëzit janë detyruar ta shohin bijën e tyre duke e dhunuar. Kjo fotografi mbetët shenjë. Kjo grua është gjallë dhe po kërkon diçka nga ne”, kishte thënë Brovina më 2012, raporton Klan Kosova.

Shtatë vjet më pas, dje, Brovina e nxori sërish në pah këtë fotografi dhe atë para plot gazetarëve në Kuvendin e Kosovës.

Lajmi mori dhenë dhe pati fillimisht shumë reagime pro e kundër veprimit të deputetes e cila krejt jetën ia kushtoi mbledhjes së fakteve dhe çështjes kombëtare.

Por fotografia që preku emocionalisht shumë njerëz, më vonë u kontestua.

Duket se ajo nuk është bërë në Kosovë dhe si i përket skenave të filmave me përmbajte për të rritur.

Brovina, ndonëse mbrëmë insistoi në origjinalitetin e fotografisë, sot gjatë ditës pas intervistës që dha në Prokurori kërkoi falje dhe tha se mund të jetë mashtruar më 2003 kur dikush ia dha këtë “dëshmi”.