Pas largimit të Toni Kroos, Real Madrid-i nuk është përforcuar me një lojtar të karakteristikave të tij dhe i mungon gjermani.

Martin Zubimendi është vendosur si një nga asetet më të kërkuara në skenën e futbollit spanjoll, duke tërhequr vëmendjen e Real Madrid-it dhe vetë Florentino Perez-it. Largimi i Toni Kroos-it ka lënë një boshllëk të rëndësishëm në bërthamën e “Los Blanocs” dhe presidenti e sheh mesfushorin e Real Sociedad-it si zëvendësuesin ideal për të rikthyer ekuilibrin dhe dinamizmin në ekip, thonë raportet nga Spanja.

Mesfushori i Sociedad-it, Zubimendi, shquhet për cilësinë e tij teknike dhe aftësinë për të menaxhuar ritmin e lojës, por edhe aftësisë së tij për t’u përshtatur në projektin afatgjatë të klubit kryeqytetas.

Lojtari bask ka qenë i rëndësishëm në suksesin e fundit të Real Sociedad-it, duke u dalluar për inteligjencën e tij taktike, saktësinë në pasime dhe aftësinë për të rikuperuar topin.

Këto karakteristika e kanë vënë atë në radarin e klubeve të mëdha evropiane, por është Real Madrid-i ai që është i gatshëm të bëjë një përpjekje të konsiderueshme për ta sjellë në “Santiago Bernabeu”.

Zubimendi shquhet për qetësinë e tij në fushë dhe profilin e tij si lojtar i kompletuar, cilësi që përshtaten në mënyrë të përkryer me kërkesat e një skuadre të përmasave madrilene.

Largimi i Kroos-it, ikonës dhe trurit të mesfushës së bardhë për gati një dekadë, ka lënë një boshllëk që ende nuk është mbushur me të njëjtën aftësi. Ardhja e Zubimendi-t mund të përfaqësojë një hap drejt stabilizimit të skuadrës, duke i dhënë një lojtar të ri, por me përvojë në La Liga dhe të mësuar të udhëheqë në zonën qendrore të fushës.

Perez e di se operacioni për nënshkrimin e mesfushorit nuk do të jetë i lehtë, por nënshkrimi i tij është një prioritet i qartë.

Real Madrid-i, i njohur për ambicien e tij dhe kërkimin e talenteve të nivelit të lartë, është i përgatitur të përpiqet të joshë Real Sociedad-in dhe të bindë vetë Zubimendi-n.

Pritshmëritë janë të mëdha në kryeqytet dhe negociatat mund të shënojnë merkaton e radhës, duke ripërcaktuar mesfushën e një prej klubeve më prestigjioze në botë.