Në Florida, fëmijët nën moshën 14 vjeç do të ndalohen të bashkohen në rrjetet sociale duke filluar nga viti i ardhshëm. Është një ligj i nënshkruar nga guvernatori Ron DeSantis dhe ligji kërkon që kompanitë që zotërojnë rrjetet sociale të fshijnë llogaritë e personave nën moshën 14 vjeç.

Fëmijët e moshës 14 dhe 15 vjeç do të kenë nevojë për pëlqimin e prindërve përpara se të regjistrohen në platforma të tilla si Instagram dhe Snapchat, raporton Sky News . Kompanitë që nuk arrijnë të fshijnë profilet rrezikojnë të paditen në emër të fëmijëve. Në rast të shkeljes së ligjit, kompanitë mund të paguajnë gjobë nga 10,000 deri në 50,000 dollarë.

Ligji i ri do të hyjë në fuqi në Florida janarin e ardhshëm. Ligji ka ngjallur tashmë zemërim në mesin e kompanive të mediave sociale që pretendojnë se shkel Kushtetutën e SHBA.

Kryetari republikan i shtetit Paul Renner e quajti projektligjin prioritetin e tij kryesor dhe tha se “një fëmijë në zhvillim nuk mund ta dijë se teknologjia mund të krijojë varësi”. Projektligji përcakton gjithashtu materialin e dëmshëm për fëmijët si përmbajtje “që nuk ka vlerë serioze letrare, artistike, politike apo shkencore për të miturit”, së bashku me përshkrime “qartësisht fyese” të sjelljes seksuale dhe turpësisë.

“Kompanitë që dështojnë të ndalojnë aksesin në një material të tillë, ose ndalojnë aksesin në të ardhmen ndaj një të mituri pas njoftimit, janë përgjegjëse ndaj të miturit për një akses të tillë, duke përfshirë shpenzimet gjyqësore dhe tarifat e arsyeshme të avokatëve,” thotë ligji i ri.

Renner pranoi se e di që kompanitë e mediave sociale do të padisin sapo të nënshkruhet kjo, por ai mendon se shteti do t’i mundë ato. “Ne do t’i mposhtim ata dhe nuk do të ndalemi kurrë,” tha ai. DeSantis, i cili kohët e fundit pezulloi fushatën e tij për nominimin presidencial republikan, gjithashtu mbështeti projektligjin.