Liberty Media, kompania që menaxhon sportin e Formulës 1, ka vendosur që garat e mbetura të këtij sezoni të zhvillohen pa tifozë.

Edhe pse kriza e krijuar nga pandemia Covid-19 ka prekur rëndë këtë sport dhe kërkesat e tifozëve janë të larta, sërish Liberty Media ka qenë e prerë në vendimin e saj për të mos lejuar tifozët.

“Nuk do ta lejojmë praninë e tifozëve për garat e fundit të këtij sezoni (edhe katër të tilla). Situata globale nuk na lejon që të zhvillojmë gara me dyer të hapura dhe me praninë e publikut në tribuna”, kanë thënë drejtuesit e Liberty Media.

Ekziston frika që edhe garat e sezonit të ardhshëm të zhvillohen sërish pa tifozë, si një masë parandaluese për përhapjen e virusit vdekjeprurës. Këtë sezon, vetëm tri gara kanë pasur një numër të limituar tifozësh, ato të zhvilluara në Mugello, Sochi dhe Portimao.