Deklarata e përfaqësuesit special të BE-së për dialogun Kosovë – Serbi, Miroslav Lajçak, se të gjitha palët janë të gatshme për dialog, është pasuar me një qëndrim të përbashkët të Ministrisë së Punëve të Jashtme të Gjermanisë dhe asaj të Francës.

Kryediplomati gjerman Heiko Masss dhe Jean Yves Le Drian përmes një qëndrimi të përbashkët kanë kërkuar rinisje të dialogut të ndërmjetësuar nga Bashkimi Evropian dhe i kanë dhënë mbështetjen e tyre emisarit të BE-së për dialogun, Miroslav Lajçak.

Në këtë qëndrim të përbashkët të Parisit dhe Berlinit thuhet se janë të vetëdijshëm për çështjet e shumta që duhet të zgjidhen mes Kosovës dhe Serbisë përpara se të arrihet një marrëveshje finale.

Por thonë se duhet që negociatat të jenë të strukturuara mirë dhe të ketë një qasje serioze. Dy kryediplomatët kanë dalë kundër një marrëveshje të shpejtë në mes të Kosovës dhe Serbisë.

“Ne jemi të vetëdijshëm për çështjet e shumta të hapura që duhet të zgjidhen para se të arrihet një marrëveshje. Nuk ka rrugë të shkurtra dhe asnjë zgjidhje të shpejtë. Një qasje serioze kërkon negociata të strukturuara mirë, të thella, me BE-në si një ndërmjetës. Nevojiten më shumë ndërmjetësim dhe vendosmëri politike – diçka që mund të prisni nga Mirosllav Lajçak dhe ekipi i tij – me mbështetjen e Përfaqësuesit të Lartë Borrell, si dhe të Berlinit dhe Parisit”, thuhet në letër.

Gjithashtu, në këtë letër të përbashkët është përmendur gatishmëria e Francës për të  organizuar një Samit të dytë për dialogun, por thonë se për një gjë të tillë është e nevojshme të ketë gatishmëri për kthim në procesin e negociatave.

Dialgou në mes të Kosovës dhe Serbisë është bllokuar që nga nëntori i vitit 2018 kur Ramush Haradinaj si kryeministër kishte vendosur taksë 100  % për Serbinë.

Përpjekjeve të Gjermanisë dhe Francës për zhbllokim të situatës u është bashkuar edhe SHBA-ja, derisa në Kosovë aktualisht ka ndasi rreth asaj se kush duhet ta drejtojë dialogun.

Kryeministri në detyrë, Albin Kurti, ka thënë se Bashkimi Evropian s’mund të zëvendësohet me asnjë kontinent tjetër, derisa presidenti Hashim Thaçi është i prerë në atë se Amerika duhet të ketë rolin udhëheqës në arritjen e një marrëveshje me Serbinë.