Franca nuk planifikon të imponojë masa të reja tash për tash, pavarësisht rrezikut nga varianti i ri, Omicron, ka thënë më 14 dhjetor zëdhënësi i qeverisë franceze, Gabriel Attal.

“Aktualisht janë rreth 130 raste të konfirmuara me variantin, Omicron”, ka thënë Attal, duke shtuar se qeveria franceze vazhdimisht është duke e monitoruar situatën.

Në anën tjetër, Franca pritet të goditet nga vala e gjashtë e koronavirusit, muajin e ardhshëm pas paraqitjes së variantit të ri, pohuan ekspertët shëndetësorë spitalorë në Francë, shkruan “Reuters”.

“Nuk e thamë asnjë fjalë lidhur me valën e gjashtë, e që është Omicron, që do të ndodhë më vonë, në janar”, ka thënë Martin Hirsch, udhëheqës i grupit spitalor parisien, AP-HP, ndryshe sistemi më i madh spitalor në Evropë.

Njëkohësisht, Franca ende po ballafaqohet me valën e pestë dhe variantin Delta, kanë pohuar mjekët.

Varianti i ri i koronavirusit, Omicron – i raportuar fillimisht në Afrikën e Jugut – megjithatë ka nxitur alarm global, me mbyllje të kufijve dhe kufizime të tjera.

Organizata Botërore e Shëndetësisë paralajmëroi se varianti i ri i koronavirusit Omicron paraqet rrezik të madh për rritjen e infeksioneve në të gjithë botën.