Forca e Sigurisë së Kosovës (FSK) ka marrë vendin e dytë në garën prestigjioze ushtarake “Cambrian Patrol 19”.

“Në njërën prej garave ushtarake më prestigjioze në botë ‘Cambrian Patrol 19’, ekipi i Forcës së Sigurisë të Kosovës arriti që të rrëmbej medaljen e argjendtë, duke u radhitur i dyti në këtë garë. Gara patrulluese filloi më datën 16 tetor 2019 dhe zgjati 48 orë, pa ndërprerë, ku morën pjesë gjithsej 132 ekipe, prej të cilave 34 ishin nga shtetet e ndryshme”, është thënë në njoftimin FSK-së.

Kjo është hera e tretë që Forca e Sigurisë merr pjesë në këtë ushtrim përkrah ushtrive nga Maqedonia e Veriut, Bosnja e Hercegovina dhe Greqia.

“Kjo është hera e tretë që FSK-ja po merr pjesë në garën ndërkombëtare ushtarake “Cambrian Patrol“, e cila organizohet nga Brigada e Këmbësorisë 160-të e Ushtrisë së Mbretërisë së Bashkuar. Përveç Republikës së Kosovës, në garën ‘Cambrian Patrol 19’ në Mbretërinë e Bashkuar, morën pjesë edhe ekipet e forcave të armatosura të vendeve të rajonit, si nga Maqedonia e Veriut, Bosnja e Hercegovina dhe Greqia. Gara ‘Cambrian Patrol 19’ është një aktivitet shumë sfidues dhe prestigjioz ushtarak që teston të gjitha aftësitë themelore ushtarake të ushtarit të sotëm, duke rritur aftësinë e udhëheqjes dhe nivelin e qëndrueshmërisë dhe vendosmërisë”, është thënë në këtë njoftim.

/Epoka e re/