Shqiptarët nuk janë më ushtarë dhe organizatat kriminale shqiptare nuk janë më pak të rëndësishme se vetë mafia italiane Ndragheta.

Deklarata vjen nga Kolonel Vincenzo Mangia, Kreu i Qendrës Operative të Antimafias së Barit, i cili në një intervistë ekskluzive për Rtv Ora lidhur me operacionin “Shpirti” që çoi në pranga 28 persona thotë se shqiptarët furnizojnë paketa komplete në trafiqet e lëndëve narkotike.

Rtv Ora: Në operacionin “Shpirti” keni nënvizuar se është shtrirë jo vetëm në Shqipëri por dhe në Spanjë, në Mal të Zi, e specifikisht dhe në Barcelonën jugore. Cili ishte filli lidhës i të arrestuarve në këto vende?

Kolonel Vincenzo Mangia: Organizatat kriminale italiane e shqiptare kanë dëshmuar prej vitesh aftësi në shtrirje e kontakte ndërkombëtare. Në Itali ka rol të rëndësishëm Ndrangheta në furnizimin e Europës me kokainë por shqiptarët nuk janë më pak të rëndësishëm e nuk punojmë më si ushtarë. Furnizojnë paketa komplete në trafiqet e lëndëve narkotike. Fakt që në Shqipëri, gjen hashashin që vjen nga Maroku e që kalon nga Spanja e trafikohet në Itali, kokainën e heroinën që vjen nga Holanda tregon se këto grupe kriminale si shqiptarë e italianë kanë anëtarë e tyre që veprojnë si broker të drogës në këto vende. Në Malin e Zi është arrestuar një person i cili ndodhej në burg për akuza të mëparshme, ndërsa arrestimet e hetimet në Spanjë koordinohen nga Interpol e nga autoritetet shqiptare.

Gjatë intervistës për gazetaren tonë në Romë, Alba Kepi, kolonel Mangia zbardhi ekskluzivisht detajet e Operacionit të përbashkët SPAK-Antimafia që çoi në ekzekutimin e 28 urdhërarresteve dhe sekuestrimin e miliona eurove pasuri.