Kur ka kaluar më shumë se një muaj nga dueli i unifikimit të titujve kampionë bote në peshën e rëndë, boksieri britanik Tyson Fury është i bindur se ai e fitoi duelin me Oleksandr Usyk.

Ish-kampioni i botës, që pësoi humbjen e parë në karrierë, pretendon se humbja e tij ishte rezultat i një dueli që për të ishte “shumë i lehtë”.

Fury pësoi humbjen e parë të karrierës së tij profesionale, duke i hapur rrugën një revanshi më 21 dhjetor. “Mbreti Cigan” u shpëtua nga gongu dhe gjyqtari në raundin e nëntë, pasi i mbijetoi një numërimi. Para kësaj, Fury shprehet se kishte nën kontroll duelin, për të cilin ai këmbëngul se po e shijonte shumë.

“E kam parë duelin shumë herë dhe sërish kam të njëjtën përgjigje: Mendova se e fitova sfidën dhe mendova se kisha bërë mjaftueshëm. Usyk e di që ai nuk më mundi”, tha Fury, që më tej befason me deklaratën e tij.

“Beteja ishte në fakt shumë më e lehtë nga sa mendoja se do të ishte, shumë më e lehtë. Njerëzit thonë se ai është një njeri i vështirë për t’u goditur, unë po bëja kombinime me tre ose katër grushte, duke qeshur me të. Problemi im në atë luftë ishte se ndoshta po argëtohesha shumë. Ndoshta ishte shumë e lehtë. Ndonjëherë ishte shumë e lehtë”, tha Fury.

“Ishte sikur isha aty me një boksier amator vendas dhe thjesht po e shijoja shumë dhe po ngatërrohesha. Pagova çmimin përfundimtar në raundin e nëntë kur mora një raund 10-8 dhe u preva. Kjo është ajo që ndodh kur argëtohesh shumë. Por më pëlqeu”, tha Tyson Fury.

Duke iu drejtuar Usyk, ai shtoi: “Le të shohë më mirë veten e tij. Kam dëgjuar se ai ka një nofull të thyer dhe gropë të syrit. Gjithsesi, do të shihemi në dhjetor për një ekstravagancë Krishtlindjesh në Arabinë Saudite”.